काठमाडौं । रेखा पौडेल र प्रीति राईको ह्याट्रिकमा नेपालले माल्दिभ्सविरुद्ध ११–० को फराकिलो जित निकाल्दै साफ महिला च्याम्पियनसिप–२०२४ को सेमिफाइन सम्भावना बलियो बनाएको छ । 

सोमबार त्रिपुरेश्वरस्थित दशरथ रंगशालामा सम्पन्न खेलमा नेपाललाई फराकिलो जित दिलाउन रेखाले पाँच गोल गरिन् । यस्तै, प्रीति राईले ह्याट्रिक गर्दा सविता रानामगर, अनिता केसी र अमिषा कार्कीले एक–एक गोल गरिन् ।

खेलको अधिकांश समय आक्रमण बुनेको नेपालाई छैटौँ मिनेटमा प्रीतिले गोल गर्दै अग्रता दिलाइन् । २९औँ मिनेटमा सविताले नेपालको अग्रता दोब्बर बनाइन् । सविताले राइट साइड बक्स बाहिरबाट ‘सेकेन्ड बार’ मा उत्कृष्ट गोल गरिन् ।

३२औँ मिनेटमा रेखाले गोल गर्दै नेपाललाई ३–० को अग्रतामा राखिन् । राइट साइडबाट रश्मिले निकालेको क्रसमा रेखाले सहजै गोल गरिन् ।

४२औँ मिनेटमा रेखाले दोस्रो गोल गर्दा नेपालले अग्रताालाई ४–० मा पुर्‍यायो । लेफ्ट साइडबाट सविताले निकालेको क्रसलाई सहजै नियन्त्रणमा लिँदै रेखाले बललाई जाली चुमाइन् ।

४८औँ मिनेटमा रेखाले ह्याट्रिक पूरा गर्दै नेपालको अग्रतालाई ५–० मा पु‍र्‍याइन् । साफ महिला च्याम्पियनसिपको सातौँ संस्करणको यो पहिलो ह्याट्रिक हो । 

६३औँ मिनेटमा रेखाले बक्सभित्र पाएको बल नियन्त्रणमा लिँदै ‘वान भर्सेस वान’मा माल्दिभ्सकी गोलकिपरलाई सहजै बिट गर्दै अग्रतालाई ६–० मा पुर्‍याइन् ।

त्यसको दुई मिनेटपछि नै प्रीति राईले गोल गर्दै नेपालको अग्रतालाई ७–० मा राखिन् । रेखाले राइट साइड बक्सबाट निकालेको पासमा प्रीतिले १८ यार्ड बक्स बाहिरबाट उत्कृष्ट ‘टप कर्नर’ गोल गरिन् ।

६८औँ मिनेटमा ‘सब्सिच्युट’ अनिताले गोल गर्दै नेपालको अग्रतालाई ८–० मा पुर्‍याइन् । अनिताले मैदान प्रवेश गरेको एक मिनेटमै गोल गरेकी हुन् । उनी ६७औँ मिनेटमा रश्मिकुमारी घिसिङको स्थानमा मैदान प्रवेश गरेकी थिइन् ।

७८औँ मिनेटमा रेखाले नेपालबाट पाँचौ गोल गर्दै ६ हजार ६७३ समर्थकमाझ अग्रतालाई ९–० मा राखिन् । अनिता केसीले पेनाल्टी बक्सभित्रबाट निकालेको पासलाई रेखाले सदुपयोग गर्दै पोस्टको दिशा दिइन् ।

यस्तै, ८७औँ मिनेटमा प्रीतिले पेनाल्टी सदुपयोग गर्दै गोल गर्दा नेपालले अग्रतालाई १०–० मा पुर्‍याएको थियो । त्यसको अर्को मिनेटमै अमिषा कार्की नेपाली टिमका लागि ११औँ गोल गरिन् ।

यसबाहेक, नेपालले खेलभर करिब एक दर्जन गोलका अवसर सिर्जना गरेको थियो । 

जितसँगै दुई खेलबाट चार अंक जोडेको नेपाल समूह ‘बी’को शीर्ष स्थानमा उक्लिएको छ । नेपाल यसअघि पहिलो खेलमा भुटानविरुद्ध गोलरहित बराबरीमा रोकिएको थियो । नेपालले अब समूह चरणको अन्तिम खेलमा श्रीलंकाविरुद्ध खेल्ने छ । यो खेल बिहीबार दशरथ रंगशालामै हुने तालिका छ ।

दुई खेलमध्ये दुवैमा हार बेहोरेको माल्दिभ्स भने प्रतियोगिताबाट बाहिरिएको छ । प्रतियोगिताबाट बाहिरिने पहिलो टिम बनेको माल्दिभ्स यसअघि पहिलो खेलमा श्रीलंकाविरुद्ध १–० ले पराजित भएको थियो ।

तस्बिरहरू : हरिशजंग क्षेत्री/बाह्रखरी