काठमाडौं । सुदूरपश्चिम रोयल्सले नेपाल सुपर लिग (एनपीएल) का लागि पहिलो विदेशी खेलाडीका रूपमा स्कटल्यान्डका अलराउन्डर ब्रान्डन मक्मलेनलाई अनुबन्ध गरेको छ । उनको आगमनले एनपीएलमा टोलीको प्रर्दशन उत्कृष्ट रहने सुदूरपश्चिम रोयल्सको विश्वास छ ।

दायाँ हाते ब्याटर मक्मलेनले स्कटल्यान्डबाट १६ टी–ट्वान्टी आईमा ६ अर्धशतकसहित ४९७ रन बनाएका छन् । उनले सन् २०२३ मा जर्मनीविरुद्ध खेल्दै टी–ट्वान्टी आईमा डेब्यू गरेका थिए ।

उनी स्कटल्यान्डको ओडीआई टोलीको पनि सदस्य हुन् । उनले २२ ओडीआईमा दुई शतक र दुई अर्धशतकसहित ७२१ रन बनाएका छन् ।

सुदूरपश्चिम रोयल्सले यसअघि अस्ट्रेलियाका विश्वकप विजेता पूर्वक्रिकेटर ब्राड हजलाई आफ्नो प्रमुख मेन्टर नियुक्त गरिसकेको छ ।

दीपेन्द्रसिंह ऐरी मार्की खेलाडी रहेको सुदूरपश्चिम रोयल्सको मुख्य प्रशिक्षकमा जगत टमाटा छन् । सुदूरपश्चिम रोयल्समा ओलम्पियन दीपक विष्ट ब्रान्ड एम्बेसडर र केपी खनाललाई सोसियल एक्टिभिस्ट एम्बेसडर छन् ।

नेपाल क्रिकेट संघ (क्यान)को आयोजनामा हुने एनपीएलमा आठ टोली सहभागी छन् । प्रतियोगिता मंसिर १६ गतेदेखि हुने तय भएको छ ।

सुदूरपश्चिम रोयल्सको टिम

दीपेन्द्रसिंह ऐरी, आरिफ शेख, अभिनास बोहोरा, विनोद भण्डारी, अर्जुन कुमाल, खडक बोहोरा, इशान पाण्डे, नरेश बुढाऐर, भोजराज भट्ट, नरेन साउद , अमित श्रेष्ठ, ब्रान्डन मक्मलेन ।