काठमाडौं । कप्तान लियोनल मेसीको ह्याट्रिकप्रेरित इन्टर मियामीले मेजर लिग सकर (एमएलएस) इस्टर्न कन्फेरेन्सको अन्तिम खेलमा न्यु इंग्ल्यान्डविरुद्ध ६–२ को जित निकालेको छ । 

आइतबार बिहान भएको खेलमा मियामीलाई जित दिलाउन मेसीले ह्याट्रिक गर्दा लुइस स्वारेजले दुई र बेन्जामिन क्रेमास्चीले एक गोल थपे । एमएलएसको क्लब मियामीमा अनुबन्धित भएयता मेसीले लिगमा गरेको यो पहिलो ह्याट्रिक हो । यसअघि मेसीले अन्तर्राष्ट्रिय ब्रेकका दौरान अर्जेन्टिनाबाट बोलिभियाविरुद्धको खेलमा पनि ह्याटिक गरेका थिए । 

जितसँगै मियामीले ३४ खेलबाट ७४ अंक जोड्दै सपोटर्स सिल्डको उपाधि जितेको छ । एमएलएसको इतिहासमा कुनै पनि टिमले जोडेको यो हालसम्मको सबैभन्दा ठूलो अंक हो । यसअघि सन् २०२१ मा न्यु इंग्ल्यान्डले ७३ अंक जोड्दै यो कीर्तिमान बनाएको थियो । 

लिगमा मियामीबाट मेसी र स्वारेजले समान २० गोल गरेका छन् । मेसीले मियामीबाट १९ खेल खेल्दा १६ असिस्टसमेत गरेका छन् ।