पोखरा । शुक्रबार विपक्षी दलहरूको संयुक्त बैठकमा नै राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेविरुद्ध पक्राउ पुर्जी जारी हुने विषयले प्रवेश पाएको थियो । नेकपा (माओवादी केन्द्र)का अध्यक्ष पुष्पकमल दाहाल (प्रचण्ड) ले लामिछाने एक–दुई दिनमै पक्राउ पर्ने सूचना पाएको बताएका थिए ।

पोखराको सूर्यदर्शन सहकारी ठगी प्रकरणमा लामिछाने गोर्खा मिडिया नेटवर्कको सञ्चालक हुँदा जोडिएका थिए । सूर्यदर्शनसहित विभिन्न सहकारीबाट गोर्खा मिडियामा गएको ६५ करोड रकम खर्च गर्दा लामिछानेको हस्ताक्षर भेटिएको थियो । संसदीय छानबिन समितिले नै लामिछानेलाई कारबाही गर्न सिफारिस गरेको थियो ।

समितिको प्रतिवेदन बाहिरिनासाथ त्यसको पक्ष–विपक्षमा पनि माहोल निकै तातेको थियो । प्रधानमन्त्री तथा नेकपा (एमाले)का अध्यक्ष केपी शर्मा ओली अमेरिका र प्रहरी महानिरीक्षक पनि देशबाहिर भएका कारण तत्काल लामिछाने पक्राउ पर्ने सम्भावना टर्‍यो । लामिछाने पक्राउ नपरे पनि असोज ६ गते प्रहरीले तत्कालीन समयमा उनका व्यावसायिक साझेदार छविलाल जोशीलाई पक्राउ गरेको थियो ।

समितिको प्रतिवेदन अनुसार सहकारीमा छवि र रविको भूमिका समान थियो । त्यसकारण पनि लामिछाने ढिलोचाँडो पक्राउ हुने नै थिए ।

दसैँ बिदा सकिएलगत्तै शुक्रबार कास्की प्रहरीले जिल्ला अदालत कास्कीबाट लामिछानेविरुद्ध अनुसन्धानको लागि पक्राउ पुर्जी लियो । लामिछानेलाई पक्राउ पुर्जी र उनका साझेदार छविविरुद्ध पनि अनुसन्धानका लागि म्याद थप गर्नका लागि प्रहरी अदालत पुगेको थियो ।

घटस्थापनादेखि कोगाज्रत पूर्णिमासम्म अदालत बन्द हुने भएका कारण शुक्रबार नै प्रहरीले सूर्यदर्शन सहकारी प्रकरणमा पक्राउ पुर्जीदेखि म्याद थप एकैदिन गर्न पुगेको थियो । तर, जिल्ला अदालत कास्की भने झन्डै न्यायाधीश शून्य बन्न पुगेको थियो ।

जिल्ला अदालत कास्कीमा सातजना न्यायाधीश छन् । तीमध्ये ६ जना न्यायाधीश बिदामा छन् । न्यायाधीश कृष्णजंग शाह पनि बिदा बस्न चाहेका थिए । तर, अदालत नै न्यायाधीश शून्य हुने भएपछि उनी हतारहतार आज नै नेपालगञ्जबाट १०ः४५ को फ्लाइटमा पोखरा आएका हुन् ।

विमान ढिलो उडान हुँदा उनी साढे ३ बजेमात्रै अदालत प्रवेश गरेका थिए । त्यतिबेलासम्म कास्की प्रहरी प्रमुख प्रहरी उपरीक्षक श्यामबाबु ओलिया र डीएसपी (प्रहरी नायब उपरीक्षक) वसन्तकुमार शर्मा लामिछानेलाई पक्राउ गर्नुपर्ने कारणसहितको मुद्दाको फाइल बोकेर न्यायाधीशको च्याम्बरमा छिरेका थिए ।

करिब डेढ घण्टाको छलफलपछि शाहको इजलासले पक्राउ पुर्जी र म्याद थप गर्ने निर्णय गरेको हो ।
आफूविरुद्ध पक्राउ पुर्जी जारी लामिछाने स्वयंले सामाजिक सञ्जालमा आफू 'ठग नभएको' जिकिर दोहोर्‍याए ।

लामिछानेलाई शुक्रबार नै प्रहरीले पक्राउ गरेको पोखरातर्फ ल्याएको छ । लामिछानेको कास्कीसँगको सम्बन्ध त्यति राम्रो छैन । उनी सहकारी ठगी प्रकरणमा जोडिएको पनि पोखराबाट नै हो ।

आफू गृहमन्त्री हुँदा सहकारी ठगीमा संलग्नलाई समात्न नसकेको, आफैँमाथि छानबिन चलिरहेका बेला अनुसन्धानलाई रोकेको आशंकासहित पोखराका सहकारी पीडित उनीदेखि असन्तुष्ट छन् ।

गत वर्ष ७ पुसमा पोखराको अमरसिंह चोकमा भाषण गर्ने क्रममा उनीमाथि खोया प्रहार भएको थियो । त्यसपछि नै उनको नाम सहकारी ठगी प्रकरणमा जोडिएको हो ।

त्यतिबेला खोया प्रहार गर्ने युवा सहकारीसँग नजोडिएको खुले पनि लामिछानेमाथि भने त्यसपछि निरन्तर सहकारी जोडिएका विषय सार्वजनिक भए ।

पोखराकै सूर्यदर्शनदेखि बुटवलको सुप्रिमलगायत विभिन्न सहकारीमा लामिछानेको नाम जोडिन थाल्यो । उनी प्रबन्ध निर्देशक हुँदा गोरखा मिडियामा सूर्यदर्शन सहकारीबाट करोडौँ रकम गएको खुलेको छ ।

पोखरा महानगरपालिकाको प्रतिवेदन अनुसार, लामिछानेको नाममा पनि सहकारीबाट एक करोड रुपैयाँ गएको छ । महानगरको प्रतिवेदनले उनको नाममा रकम गएको देखाएपछि पोखरामा लामिछानेको झन् चर्को आलोचना हुन थालेको हो ।

अठार हजारभन्दा धेरै बचतकर्ताको एक अर्ब ११ करोड रकम सूर्यदर्शन सहकारीले अपचलन गरेको प्रतिवेदनमा उल्लेख छ ।

पीडितहरूले गृहमन्त्री हुँदा लामिछानेलाई भेटेर नै बचत रकम फिर्ता गराइदिन पटकपटक आग्रह गरेका थिए । तर, लामिछानेले कास्कीका एसपीलाई काठमाडौंमा बोलाएर आफ्नो पक्षमा बोल्न लगाएको आरोप उनीमाथि छ ।

जबकि, गत माघ २२ गते पीडितहरूले लामिछानेविरुद्ध पनि जिल्ला प्रहरी कार्यालय कास्कीमा पूरक उजुरी दर्ता गरेका थिए । यस्तो अवस्थामा निष्पक्ष छानबिन गर्नुको सट्टा अनुसन्धान गर्ने निकायलाई नै आफू सहकारीमा संलग्न नरहेको भनेर बोल्न लगाएको पीडितहरूको आरोप छ ।

लामिछानेमाथि गत वर्ष ७ पुसमा खोया प्रहार हुँदा नै पीडितहरूले आन्दोलनको तयारी गरेका थिए । कार्यक्रमको अघिल्लो दिन ६ पुसमै पोखरा आएका लामिछानेले आफूविरुद्ध आन्दोलन हुने सूचना पाएका थिए । त्यसपछि उनले सहकारीपीडितलाई पार्टीका प्रदेश समिति कार्यालयमा डाके । राति २ घण्टासम्म उनले पीडितका प्रश्न सुने, ज्ञापनपत्र बुझे ।

उनले समस्या समाधान गर्न आफू तयार रहेको प्रतिबद्धता जनाए । यस भेटको दुई महिनापछि फागुनमा लामिछाने गृहमन्त्री बने । तर, जीबी राईलाई नेपाल झिकाउने काममा असफल भए । त्यसपछि सहकारीपीडित लामिछानेप्रति झनै आक्रामक बने ।

अन्तिमपटक उनी पोखरा आउँदा 'सहकारी ठग'को उपमा सुन्नुपर्‍यो । सहकारीको रकम ठगेर राष्ट्रिय पार्टी बनाएको आरोप उनीमाथि लाग्यो । यतिसम्म कि रास्वपाका सदस्य र सहकारीपीडितहरू आमनेसामने नै हुन पुगे ।

उनै सहकारी पीडितहरूले दिएको पूरक उजुरी तथा संसदीय छानबिन समितिको प्रतिवेदनपछि अन्ततः लामिछानेलाई पक्राउ गरेर पोखरा नै ल्याइँदै छ ।

यसअगाडि पनि सहकारी पीडित र रास्वपाका सदस्यहरूको प्रदर्शन तनावपूर्ण हुने संकेत देखिइसकेको छ । झन् अहिले पक्राउ नै गरेर पोखरा ल्याउने भनेपछि कास्कीका सुरक्षा निकाय 'हाई अलर्ट'मा बसेका छन् ।

गत भदौ २५ गते जिल्ला प्रशासन कार्यालय अगाडि नै रास्वपा समर्थक र सहकारी पीडितबीच तनावग्रस्त अवस्था देखिएको थियो । त्यतिबेला रवि पोखरा मात्र आएका थिए, उनीविरुद्ध कुनै पुर्जी जारी भएको थिएन । रविले कार्यक्रमलाई सम्बोधन गरेको स्थलबाहिर पनि चर्को नाराबाजी भएको थियो । प्रहरीको स्कर्टिङमा गेट लगाएर कार्यक्रम गर्नुपरेको अवस्था थियो । त्यसलाई सुरक्षा संयन्त्रले नजिकबाट नियालेको छ ।

कास्कीका प्रमुख जिल्ला अधिकारी भरतमणि पाण्डेले आवश्यक सुरक्षा प्रबन्ध गरिएको बताए । आवश्यकता अनुसार नै सम्भावित 'रेड जोन' तोकिएको र त्यहाँ सोही अनुरूपको सुरक्षा प्रबन्ध गरिएको उनको भनाइ छ ।

रविलाई शुक्रबार राति नै पोखरा ल्याइँदै छ । शनिबार सार्वजनिक बिदा भएको हुँदा उनलाई कास्की प्रहरीकै हिरासतमा राखिने छ । शनिबार जिल्ला प्रहरी कार्यालय कास्कीको भवन गैह्रापाटन बाहिर सुरक्षा व्यवस्था कडा हुने छ ।

सूर्यदर्शन सहकारी पीडित संघर्ष समितिले शान्तरूपमा नै बस्ने तर रविको पक्षमा नाराबाजी भए काउन्टर नाराबाजी गरिने जनाएको छ ।

आइतबारमात्रै उनलाई अदालतमा लगिने छ । सहकारी पीडितहरूले यस अगाडि पनि सहकारी ठगी प्रकरणमा पक्राउ परेकाहरूविरुद्ध नाराबाजी गर्दै आएका थिए । जिल्ला अदालतको बाहिर, जिल्ला प्रशासन कार्यालय सहिदचोकलाई पनि सुरक्षा निकायले संवेदनशील क्षेत्रमा राखेका छन् ।