काठमाडौं । डेंगीको संक्रमण बढेसँगै देशभर रगतको कमी हुन थालेको छ । बाढी, पहिरो, डेंगी र चाडपर्वका कारण काठमाडौं उपत्यकासहित देशभर रगतको कमी भएको नेपाल रेडक्रस सोसाइटीले जनाएको छ । 

नेपाल रेडक्रस सोसाइटीका केन्द्रीय रक्तसञ्चार सेवाका निर्देशक पवनकुमार गुप्ताले अहिले दसैँले गर्दा पहिलाको तुलनामा संकलन र माग कम भएको बताए । उनले अहिले डेंगी बढेकाले प्लेटलेट रिच प्लाज्माको भने माग बढेको बताए । 

उनले प्लेटलेटको माग दैनिक बढ्दै गए पनि दसैँ, तिहारजस्ता चाडपर्वले मानिस घर जाने र रगत संकलन कम हुने गर्दा माग पूरा गर्न कठिन भइरहेको बताए । 

उनले रातो रगत, होल ब्लडहरू भने रेडक्रससँग पर्याप्त रहेको बताए । गुप्ताले पीआरपीका लागि प्रत्येक दिन ताजा रगतको आवश्यक पर्ने तर रक्तदान गर्नेहरूको कमीका कारण माग पूरा गर्न कठिन भएको बताए । 

उनले एकजना बिरामीका लागि ७ वटासम्म पीआरपी माग हुने गरेको जानकारी दिए । अहिले रेडक्रसले ७० प्रतिशतसम्म माग पूरा गर्न सकेको उनको भनाइ छ । 

निर्देशक गुप्ताले डेंगी बढेका कारण पीआरपीको माग बढिरहेको भन्दै पीआरपीको माग सम्बोधन गर्न दैनिक रगत संकलन गर्नुपर्ने बताए । नजिक र पायक पर्ने ठाउँमा रक्तदान गर्न पनि रेडक्रसको तर्फबाट उनले आग्रह गरे । न्युज एजेन्सी नेपाल ।