काठमाडौं । विपक्षी गठबन्धनले दल फुटाउने अध्यादेश रोक्न संसद् बैठक बोलाउन समावेदन गर्ने भएका छन् । संघीय संसद् भवन नयाँ बानेश्वरको विपक्षी दलका नेताको कार्यकक्षमा बसेको विपक्षी गठबन्धनको बैठकले संसद् बैठक आह्वानका लागि राष्ट्रपतिसमक्ष समावेदन गर्ने निर्णय गरेका हुन् । 

भदौ ३१ गतेदेखि संसद्को वर्षे अधिवेशन अन्त्य भएको थियो । अधिवेशन अन्त्य भएको ३२औँ दिन विपक्षी गठबन्धनले समावेदन गर्ने निर्णय गरेको हो । 

साना दल फुटाएर नेकपा एमालेलाई सबैभन्दा ठूलो दल बनाउने प्रयत्न भएको भन्दै विपक्षी गठबन्धनले समावेदनको तयारी गरेको हो । विपक्षी दलहरूले सम्भवत शुक्रबार नै राष्ट्रपति रामचन्द्र पौडेलसमक्ष एक चौथाई सांसदको हस्ताक्षरसहित संसद्को अधिवेशन आह्वानका लागि समावेदन बुझाउने छन् ।

• पार्टी फुटाउन अध्यादेश ल्याउन खोजेको विपक्षीको आरोप, ध्यानाकर्षणपत्र बुझाउँदै  

प्रधानमन्त्री केपी शर्मा ओलीले अनुकूल अध्यादेश जारी गर्दै साना दल फुटाउने तयारी गरेको चर्चासँगै विपक्षी गठबन्धनले समावेदनको निर्णय गरेको हो ।

सत्तारुढ दल लोसपाका अध्यक्ष महन्थ ठाकुरलाई समेत डाकिएको बैठकबाटै यस्तो निर्णय भएको हो । ठाकुर भने समावेदन सहभागी नहुने निर्णय सुनाएर बैठकबाट बाहिरिएका थिए ।