काठमाडौं । नेपाल लाइफ इन्स्योरेन्स कम्पनीले संस्थागत सामाजिक उत्तरदायित्व कार्यक्रमअन्तर्गत ओखलढुंगा, धनकुटा र गर्जुधारा शाखाको संयोजनमा बाढीपहिरोपीडितहरूलाई राहत सामग्री प्रदान गरेको छ ।

ओखलढुंगाको मोलुङ गाउँपालिका गौरीडाँडा, जेसे र पात्लेका बाढीपीडितलाई (४५ घर परिवार) चामल, दाल, नुन, तेल र साबुन प्रदान गरिएको हो । प्रतिपरिवार ३० केजी चामल, दाल र नुन दुई–दुई किलो, तेल दुई लिटर तथा साबुन चार वटा प्रदान गरिएको छ ।

असोज दोस्रो साता परेको अविरल वर्षाका कारण त्रिशुले टोल धनकुटामा तीन घर पूर्ण रूपमा क्षति भएको थियो । कम्पनीले प्रतिघरपरिवार तीन बण्डल जस्तापाता र एक थान त्रिपाल स्थानीय तहका प्रतिनिधिको उपस्थितिमा वितरण गरेको हाे ।

यसैगरी झ्याप्ले खोलामा आएको बाढीका कारण विस्थापित ३० घरपरिवारलाई खाद्यान्न वितरण गरिएको छ । गर्जुधारा उपशाखाको संयोजनमा स्थानीय निकायको उपस्थितिमा खाद्यन्न सामग्री पीडित परिवारलाई वितरण गरिएको छ ।

कम्पनीका प्रमुख कार्यकारी अधिकृत प्रवीणरमण पराजुलीले संस्थागत सामाजिक उत्तरदायित्व कार्यक्रमअन्तर्गत यस कम्पनीले विभिन्न सामाजिक आर्थिक रूपान्तरणका क्रियाकलाप गरेको बताए । प्रभावित परिवारलाई हरसम्भव सहयोग गर्न कम्पनी सदैव तत्पर रहेको र आगामी दिनमा पनि कुनै किसिमको सहयोग चाहिएको खण्डमा कम्पनी अग्रपंक्तिमा रहेर सहयोग गर्न तयार रहेको बताए ।