काठमाडौं । चीनको दक्षिणी सहर ग्वाङ्झाउमा एक साताको अन्तरालमा डेंगी ज्वरोका बिरामीको संख्या ७३ प्रतिशतले वृद्धि भएको छ । गत हप्ता ४३७ जना डेंगीका बिरामी देखिएका थिए, जसमध्ये ३६० स्थानीय र बाँकी आयातित थिए ।

ग्वाङ्झाउमा डेंगीमा गम्भीर बिरामी समेत देखिएका छन् । रोग नियन्त्रण र रोकथामको लागि स्थानीय केन्द्रका अनुसार अघिल्लो साता डेंगीका २५२ बिरामी देखिएका थिए । ग्वाङ्डोङ प्रान्तीय रोग नियन्त्रण अधिकारीहरूले गत दुई महिनामा लामखुट्टेबाट सर्ने रोगका घटनाहरूमा भएको वृद्धिलाई नजिकबाट नियालिरहेका छन् । 

अगस्टमा प्रान्तको रोग नियन्त्रण केन्द्रले आफ्नो मासिक प्रतिवेदनमा उच्च सतर्कता अपनाउन आह्वान गरेको थियो । यस वर्ष डेंगीका बिरामी वृद्धि भएपछि केन्द्रले सतर्कता अपनाउन भनेको थियो । 

त्यसपछि ग्वाङ्डोङमा डेंगीका बिरामीको संख्या लगातार वृद्धि भएको छ । अगष्टमा एक हजार २२० जनामा डेंगीको ज्वरो देखिएको थियो भने सेप्टेम्बर ३० देखि अक्टोबर ६ सम्म एक हजार ७७० जनामा डेंगी देखिएको थियो ।

यस वर्ष ग्वाङ्डोङमा डेंगीका कारण कसैको पनि मृत्यु भएको छैन । पछिल्लोपटक गत वर्ष सेप्टेम्बरमा डेंगीका कारण चीनमा एकजनाको मृत्यु भएको थियो । त्यसयता डेंगीका कारण कसैले चीनमा ज्यान गुमाउनु परेको भने छैन । 

बढी खतरा रहेका क्षेत्रहरू ट्रयाक गर्न जारी गरिएको ग्वाङ्डोङको ‘लामखुट्टे नक्सा’ मा १० ठाउँमा बढी खतरा रहेको देखाइएको छ । सेप्टेम्बरको मध्यसम्म यो खतरा रहने जनाइएको छ । 

युरोपेली रोग रोकथाम तथा नियन्त्रण केन्द्रका अनुसार २०२४ को सुरुआतदेखि हालसम्म विश्वभर एक करोड ३० लाखभन्दा बढी डेंगीका केसहरू देखिएका छन् । उक्त अवधिमा डेंगीका कारण विश्वभर आठ हजार ५०० भन्दा बढी मानिसको मृत्यु भएको जनाइएको छ ।

विश्व स्वास्थ्य संगठन (डब्लूएचओ)ले डेंगीका केसहरू सन् २०२१ यता प्रत्येक वर्ष लगभग दोब्बरले वृद्धि भएको भन्दै चेतावनी दिएको छ । गत वर्ष डिसेम्बरमा संगठनले डेंगीको आपत्कालीन प्रतिक्रिया स्तर ‘ग्रेड ३’ मा पुगेको जनाएको थियो, जुन यसको उच्चतम स्तर हो ।

अव्यवस्थित सहरीकरण, कमजोर सरसफाइ, जलवायु परिवर्तन र अन्तर्राष्ट्रिय यात्रा जस्ता कारणले डेंगी विश्वभर द्रुत रूपमा फैलिएको डब्लूएचओले बताएको छ । 

चिनियाँ भन्सारले पनि अक्टोबर ९ बाट लागु हुने गरी आयातित सामान र कन्टेनर, बन्दरगाह क्षेत्र र डेंगी ज्वरोका लक्षण देखिएका यात्रुको निगरानी गर्न आदेश जारी गरेको छ । साउथ चाइना मर्निङ पोष्ट