काठमाडौं । जर्मन कार निर्माता बीएमडब्ल्यूले आफ्नो पहिलो हाइड्रोजन इन्धनको सवारी बजारमा सार्वजनिक गर्ने भएको छ । कम्पनीले टोयोटासँग मिलेर विकास गरेको फ्युल सेल टेक्नोलोजीको हाइड्रोजन गाडी बजारमा ल्याउने भएको हो ।

सन् २०२८ सम्म बजारमा उपलब्ध हुने यो पुरानै मोडेल हाइड्रोजन फ्युल सेल ड्राइभको विकल्पमा मिल्ने बीएमडब्ल्यूले जनाएको छ । कम्पनीले यस मोडेलको मूल्य र उत्पादन गर्ने युनिट संख्या पनि खुलाएको छैन ।

बीएमडब्ल्यूका सीईओ ओलिभर जिप्सेले यस गाडीले भविष्यको मोबिलिटीलाई आकार दिन प्रविधिमा भइरहेको विकासलाई झल्काउने दाबी गरेका छन् ।

टोयोटासँगको सहकार्यले गाडीको मूल्य कम गर्न र प्यासेन्जर कारमा प्रयोग गरिएको प्रविधि भविष्यमा व्यावसायिक सवारीमा पनि प्रयोग गर्न मिल्ने कम्पनीको भनाइ छ । बीएमडब्ल्यू जर्मन कार निर्मातामध्ये हाइड्रोजन प्रविधिमा सबैभन्दा बलियो कम्पनी हो ।

लामो समयदेखि हाइड्रोजन प्यासेन्जर गाडीमा काम गरिरहेको बीएमडब्ल्यूको आईएक्स५ हाइड्रोजनले ५०० किलोमिटर रेन्ज दिन्छ भने तीनदेखि चारमिनेटमा रिफ्युल गर्न सकिन्छ ।

भविष्यमा कुन प्रविधिले प्रमुख प्रभुत्व बनाउछ भन्ने हिसाबले दुवै कम्पनीले ब्याट्रीसँगै फ्युल सेलमा पनि काम गरिरहेका छन् ।

फ्युल सेलका गाडीले ईभीमा जस्तै विद्युतीय मोटर प्रयोग गर्छन् । मोटर चल्ने पावर भने फ्युल स्ट्याकबाट आउँछ । त्यसमा क्याटलिस्टले हाइड्रोजनलाई अलग्याउँदै विद्युत् उत्पादन गर्छ ।

हाइड्रोजन इन्धनमा आधारित गाडी तुरुन्तै रिफ्युल गर्न सकिन्छ र यसको रेन्ज पनि बढी हुन्छ । महँगो र फ्युलिङ स्टेसन नेटकर्वकको अभावका कारण कम कार निर्माताले यस प्रविधि लगानी गरेका थिए ।

बीएमडब्ल्यूले सन् २०२८ सम्म हाइड्रोजन रिफ्युलिङ स्टेसनको पर्याप्त विकास हुने अनुमान गर्दै आफ्नो योजनाअनुरूप बजार विस्तार हुने अपेक्षा गरेको छ ।

अहिले विश्वभर विद्युतीय गाडीको बजार व्यापकरूपमा विस्तार हुँदै गएको छ । ब्याट्रीको आयु, बिग्रेपछि वा म्याद नाघेपछिको व्यवस्थापन, चार्ज गर्न लाग्ने समयलगायतले ईभीभन्दा उन्नत प्रविधिले यसलाई विस्थापित गर्ने ठानिएको छ । त्यसको विकल्प अहिलेका लागि हाइड्रोजन गाडी हुन सक्ने देखिएको छ । बीएमडब्ल्यू मात्रै नभएर हुन्डाई, टोयोटालगायत कार निर्माताले पनि हाइड्रोजन फ्युल सेलको विकासमा काम गरिरहेका छन् ।

हाइड्रोजन गाडीमा हाइड्रोजनलाई पेट्रोल भरेझैँ गाडीमा क्षणभरमै भर्न मिल्छ । यसको विकारका रुपमा पानी उत्सर्जन हुन्छ । हाल प्रविधि महँगो र हाइड्रोजनको व्यवस्थापन जटिल भए पनि भविष्यमा यो सहज हुँदै जाने र हाइड्रोजन गाडीले विशेष बजार बनाउन सक्ने अपेक्षा गरिएको छ ।

रोयटर्सबाट ।