काठमाडौं । संयुक्त राष्ट्रसंघको एक रिपोर्टअनुसार म्यासेजिङ एप टेलिग्राम आपराधिक हब बनेको छ । इन्टरनेटबाट चोरिएका त्यसका प्रयोगकर्ताका डेटाहरू टेलिग्राममा बिक्री गर्ने गरिएको राष्ट्रसंघको रिपोर्टले देखाएको हो ।

राष्ट्रसंघको रिपोर्टअनुसार टेलिग्राममा क्रेडिट कार्ड विवरण, पासवर्ड र इन्टरनेट प्रयोगकर्ताका गतिविधि खुलेआम बिक्री हुन्छन् । राष्ट्रसंघको ‘अफिस अन ड्रग्स एन्ड क्राइम’ (यूएनओडीसी)को रिपोर्टअनुसार दक्षिण पूर्वी एसियामा ठूला आपराधिक समूहरूले टेलिग्राम एपको प्रयोग गरिरहेका छन् । यसले संगठित अपराधको परम्परागत तौरतरिकामा परिवर्तन आएको रिपोर्टमा लेखिएको छ ।

साइबर अपराधका लागि प्रयोग हुने उपकरणहरू जस्तैः नक्कली फोटो र भिडियो बनाउने डिपफेक सफ्टवेर । डेटा चोरीका लागि प्रयोग गरिने मालवेरहरू टेलिग्राममा व्यापक रूपमा किनबेच हुने गरेको रिपोर्टले देखाएको छ । टेलिग्राममा यी सामानको कारोबारका लागि अवैध क्रिप्टोकरेन्सीको प्रयोग गर्ने गरिन्छ ।

रिपोर्टअनुसार दक्षिण पूर्वी एसिया ठगी स्किमहरूको प्रमुख केन्द्र बनेको छ । यहाँका ठगहरूले विश्वभरका मान्छेलाई आफ्नो निशाना बनाउने गरेका छन् । यस्ता समूहले गोप्य स्थानमा कार्यालय खोलेर मानव तस्करीका माध्यमबाट श्रमिक ल्याउने गरेको पनि रिपोर्टले खुलाएको छ । यूएनओडीसीको रिपोर्टअनुसार यो ठगी उद्योगले वार्षिक रूपमा २७.४ अर्बदेखि ३६.५ अर्ब डलर आम्दानी गर्छ ।

यूएनओडीसीका अनुसार १० भन्दा अधिक डिप फेक सफ्टवेर सेवा उपलब्ध गराउनेहरूका मुख्य ग्राहक दक्षिण पूर्वी एसियामा रहेर ठगी र धोकाधडी जस्ता आपराधिक गतिविधिमा सामेल समूहहरू छन् ।

बाल यौनशोषण र आपराधिक सामग्री नियन्त्रण गर्न नसकेको आरोपमा अगष्ट महिनामा टेलिग्रामका कार्यकारी निर्देशक पावेल दुरोभ फ्रान्सको राजधानी पेरिसमा पक्राउ गरेका थिए । पक्राउ परेपछि जमानतमा रिहा भएलगत्तै उनले कानुन कार्यान्वयन गर्ने निकायले टेलिग्राम प्रयोकर्ताको डेटा मागेमा आफू उपलब्ध गराउन तयार रहेको बताएका छन् । यसका साथै गैरकानुनी गतिविधिका लागि टेलिग्राममा प्रयोग हुने फिचर्स पनि हटाउने वाचा गरेका छन् ।