काठमाडौं । नेपाल वायु सेवा निगमका कर्मचारीहरूले व्यवस्थापनविरुद्ध सांकेतिक विरोध प्रदर्शन गरेका छन् । अन्याय र विभेद भएको भन्दै सोमबार निगम परिसरमा विरोध प्रदर्शन गरेका छन् । वर्षौंदेखि कार्यरत क्याबिन क्रुहरूले सर्वोच्च अदालतले दिएको अन्तरिम आदेशविरुद्ध गई व्यवस्थापनले काम गरेको, न्यायका लागि लड्दा प्रतिशोध साँधेको भन्दै विरोध गरेका हुन् ।

निगमका ५० कर्मचारीले सोमबार बिहान कार्यकारी अध्यक्ष युवराज अधिकारी प्रवेश गर्ने बेलामा हातमा कालोपट्टी बाँधी प्रदर्शन गरेका हुन् । सर्वोच्चले गत वर्षको पुस २३ गते कर्मचारीबीच सेवा, सुविधा र सेवा अवधिमा भेद्भाव नगर्न निगमका नाममा अन्तरिम आदेश जारी गरेको थियो ।

सर्वोच्चको आदेशको अवहेलना गर्दै ‘क्याबिन क्रु’लाई अवकाश दिन लागिएको, सेवा सुविधामा भेदभाव भएको भन्दै केही दिनदेखि कर्मचारीबीच असन्तुष्टि छाएको थियो । निगमभित्रका १७२ जना ‘क्याबिन क्रु’ (एयरहोस्टेज) अन्यायमा परेको भन्दै गत वर्षको पुस १८ गते न्यायका लागि सर्वोच्चमा पुगेका थिए । सर्वोच्चले उक्त मुद्दालाई प्राथमिकता दिँदै कर्मचारीहरूमाथि विभेद रोक्न, मुद्दा हालेकै कारणले पूर्वाग्रह नराखी काम गर्न अन्तरिम आदेश दिएको थियो ।

कर्मचारीहरूले पर्यटनमन्त्री बद्री पाण्डेलाई समेत भेटी भेदभाव रोक्नका लागि आवश्यक पहल गर्न सुझावपत्र दिएका थिए । सर्वोच्चमा समेत यो विषयमा मुद्दा विचाराधीन रहेकै अवस्थामा कार्यकारी अध्यक्ष अधिकारीले पूर्वाग्रहपूर्ण ढंगले कारबाही थालेको थियो ।

सोमबार निगम परिसरमा कर्मचारीहरूले सर्वोच्चको अन्तरिम आदेश पालना गर, विभेद रोक, दमन गर पाइँदैन जस्ता प्ले कार्ड समेत बोकेका थिए । निगमभित्रको अनियमितता, भ्रष्टाचार र वेथितिबारे राज्यका अन्य निकायले छानबिन गरिरहेका बेला कर्मचारीमाथि विभेद सार्वजनिक भएको हो ।

उता नेपाल वायु सेवा निगमका अध्यक्ष युवराज अधिकारी भने आफू ‘क्याबिन क्रू’ को विषयमा निगमले तयारी गरिरहेको बताए । “उहाँहरूकै मागअनुसार निगमले आफ्नो विनियमावली सच्याउनको लागि अध्ययन गरिरहेको अवस्थामा कसैको उक्साहटमा लागेर विरोध प्रर्दशनतर्फ लागेका हुन्,” उनले भने, “अदालतमा विचाराधीन मुद्दा नटुंगीकन बीचैमा हामीले चलाउन पनि मिल्दैन होला ।”