काठमाडौं । काठमाडौंमा ‘रोस्टिङ ब्याटल’ हुने भएको छ । असोज २० गते कमलादीस्थित नाचघरमा ‘रोस्टिङ ब्याटल’ हुने भएको हो । यसलाई आयोजकले नेपालको अहिलेसम्मकै ठूलो ‘रोस्टिङ ब्याटल’ हुने बताएको छ । 

प्रदर्शनको तयारीमा रहेको चलचित्र ‘छक्का पञ्जा–५’को प्रचारका लागि यो ‘रोस्टिङ ब्याटल’ हुन लागेको हो । कमेडी च्याम्पियनको टिम र ‘छक्का पञ्जा–५’को टिमबीच ब्याटल हुन लागेको हो । 

कार्यक्रममा पाँच सयदेखि १५ सयसम्मको टिकट राखिएको छ । करिब साढे सात सय दर्शकले सहभागिता जनाउने बताइएको छ । 

“पहिला हामीले छक्का पञ्जाको टिमलाई रोस्ट गर्नेर्छौं । त्यसपछि अन्तिममा चलचित्रको टिमले हाम्रो टिमलाई रोस्ट गर्नेछ,” रोस्टिङ ब्याटलका आयोजक तथा कमेडी च्याम्पियन शोका निर्देशक विशाल भण्डारीले बाह्रखरीसँग भने । 

चलचित्रको प्रचारको यो नयाँ तरिका भएको उनको भनाइ छ । नेपालमा लागि यो नयाँ भए पनि भारतमा भने यस्ता कार्यक्रम हुँदै आएका छन् । 

‘रोस्टिङ ब्याटल’मा ‘छक्का पञ्जा–५’का दीपकराज गिरी, दीपाश्री निरौला, केदार घिमिरे, वर्षा शिवाकोटीलगायत अधिकांश कलाकार हुनेछन् । ‘रोस्टिङ ब्याटल’मा कमेडी च्याम्पियनका भरतमणि पौडेल, सुमन कार्की, सुमन कोइराला, कैलाश कार्की, सन्तोष थापालगायत कमेडियन हुने निर्देशक भण्डारीले जानकारी दिए । 

दीपाश्री निरौलाले निर्देशन गरेको चलचित्र असोज २४ गते रिलिज हुँदै छ ।