काठमाडौं । प्रधानमन्त्री केपी शर्मा ओलीले अशिष्टहरूले अराजकता मच्चाउन मौका पाए नेपाल पुस्तौँपछि पर्ने बताएका छन् । गणतन्त्र दिवसका अवसरमा टुँडिखेलमा आयोजित कार्यक्रममा ओलीले युवालाई सचेत गराउँदै समाजमा हुलमुल गराउन खोज्नेहरूबाट जोगाउन आग्रह गरेका छन् ।
 
“तपाईंहरूभित्र केही गरौँ भन्ने जुन आगो बलिरहेको छ, त्यसलाई समाजमा आगो लगाउँछु भन्नेहरूवाट बचाउनु होला । तपाईंहरूमा केही गरौँ भन्ने जुन हुटहुटी छ, त्यसलाई समाजमा हुलमुल गराउन खोज्नेहरूबाट जोगाउनु होला,” ओलीले भने, “समाजमा थिति बस्यो, समाज सभ्य भयो, अशिष्टहरूले मिच्न पाएनन् भने विकास त हामी गर्छौं । सुशासन कायम त हामी गर्छौं । तर, देश भाँडियो भने अशिष्टहरूले अराजकता मच्चाउन अलिकति मात्र मौका पाए भने हामी पुस्तौँपुस्ता पछि पर्नेछौँ ।”

उनले समाजमा अराजकता र भाँडभैलो मच्चाउने प्रवृत्ति देखिएको टिप्पणी पनि गरेका छन् । ओलीले संविधान समयानुकूल संशोधन गरिने पनि बताए । राजनीतिक तहमा देखिएको अस्थिरताको सम्बोधन केही हदसम्म संविधान संशोधनको माध्यमबाट हुने ओलीको भनाइ छ ।