काठमाडौं । गीतकार दयाराम पाण्डेयका शब्दमा बलिउडका प्रसिद्ध गायकद्वय बाबुल सुप्रियो र संजिवनीले स्वर दिएका छन् ।

२५ वर्ष अगाडि 'नेपाली बाबू' चलचित्रका लागि 'यो साईनो मायाको छुट्दैन कहिले...' बोलको कालजयी गीत गाएका बलिउडका सुप्रसिद्ध गायक/गायिका बाबुल सुप्रियो र संजिवनीको स्वरमा अमेरिका कर्मथलो बनाए पनि नेपाली गीत-संगीतलाई असाध्यै माया गर्ने संगीतकार कृष रिजालको संगीतमा रहेका पाण्डेका शब्द 'यो भाकै तिम्रो मायाले हो...' बोलको गीत पंचम स्टूडियो मुम्बईमा रेकर्डिङ भएको छ ।  

चलचित्र 'दुईपल' को मनले मनको साथ पायो.., 'हङ्गामा' को सिन्का-सिन्का जोडेर.., 'दुलही'को एकादेशमा सुनेको थिएँ.., 'पर्खि बसें' को फूलमा बागमा.., 'मेरो जीवनसाथी' को सररर वेग मारी बेनीको बस आयो.. लगायतका गीतमा संजिवनीसँग सहकार्य गरेको पाण्डेले स्मरण गरे ।

बाबुलले शाहरुख खान, सलमान खान, आमिर खान लगायत बलिउडका सबैप्राय: स्टारहरुका लागि गीत गाइसकेका छन् । बाबुल वेष्ट बंगाल भारतका पूर्वमन्त्री पनि हुन् ।