काठमाडौं । चलचित्र ‘पूर्ण बहादुरको सारङ्गी’ फर्स्ट लुक पोस्टर सार्वजनिक भएको छ । शुक्रबार निर्माण टिमले रिलिज डेट घोषणा गर्दै चलचित्रको फर्स्ट लुक पोस्टर सार्वजनिक गरेको हो । 

पोस्टरमा चलचित्रका मुख्य पात्र विजय बराल र प्रकाश सपूत फिचर्ड छन् । खुसी देखिएका विजयको क्लोजअपमा वान साइड फेस देखाइएको छ । यसले उनको अनुहारको खुसी प्रष्टै देखिएको छ । 

त्यसको ठिक तल प्रकाश सपूत छन् । उनी सरकारी स्कुलको ड्रेसमा छन् । हातमा मार्कसिट बोकेर उफ्रिदै घरतिर कुदिरहेका उनको गलामा माला छ । यसले उनी स्कुलको कुनै कक्षामा प्रथम भएको संकेत गरिरहेको बुझ्न सकिन्छ । 

प्रकाश र विजयको खुसीले उनीहरू एकै घरका सदस्य हुन् भनेर अनुमान लगाउन सकिन्छ । प्रकाशको पछाडि सानो बालकलाई काँधमा बोकेर स्कुल जाँदै गरेको तस्बिरले सिनेमामा प्रकाशको बुवाको भूमिकामा विजय हुन् कि भन्ने अनुमान लगाउन सकिन्छ । गेटअपले पनि यो संकेत गर्छ ।  तर, यसबारे निर्माणपक्षले केही जानकारी दिएको छैन । 

सरोज पौडेलको लेखन तथा निर्देशन रहेको चलचित्र विजय र प्रकाशसँगै मुकुन भुसाल, बुद्धि तामाङ, अञ्जना बराइली, माओत्से गुरुङ, देशभक्त खनाल, भोलाराज सापकोटा, विनोद न्यौपाने, अलिास बास्तोला, श्याम केसी, जानवी पौडेललगायतको अभिनय छ । 

सेभेन सिस सिनेमा र बासुरी फिल्मसको प्रस्तुति रहेको चलचित्रमा विनोद पौडेल र प्रतीक सुवेदी निर्माता हुन् । 

यो चलचित्रलाई नेपाल र अन्तर्राष्ट्रिय रूपमा सेभेन सिज इन्टरटेनमेन्टले वितरण गर्दै छ । सोसल–ड्रामा जनरा निर्माण भएको चलचित्रले नेमा गन्धर्व परिवारको कथामा आधारित रहेको छ । सिनेमाको पटकथा तथा संवाद महेश दवाडीले लेखेका छन् ।

विनोद पौडेल र प्याट्रिक सुवेदी लगानी रहेको सिनेमाका कार्यकारी निर्माता रमेश चौलागाईं, हरि श्रेष्ठ र रमेश ढकाल हुन् । सिनेमामा प्रशान्त सिवाकोटीको संगीत, हेमन्त कान्छा रसाइलीको सारङ्गी, प्रशान्त सिवाकोटी, मेलिना राई र पुष्पन प्रधानको स्वर रहेको छ ।