काठमाडौं । नेपाल क्रिकेट संघ (क्यान)को आयोजनामा हुने नेपाल प्रिमियर लिग (एनपीएल)का ६ टिमको फ्रेन्चाइजी स्वामित्व लिन १६ निवेदन परेको छ ।

क्यानले साउन १८ गते १५ दिनको म्यादसहित एनएसएलका निम्ति ६ टिमको फ्रेन्चाइज लिन आवदेन खुलाएको थियो । क्यानको उक्त आवेदनको १८ फर्म बिक्री भए पनि १६ वटा निवेदन क्यानमा आएको प्रवक्ता छुम्बी लामाले बाह्रखरीलाई बताए ।

“एनपीएलका टिमको फ्रेन्चाइजी स्वामित्व लिन क्यानले खुलाएको आवेदनपछि १८ वटा फर्म बिक्री भएको थियो । जसमा १६ वटा निवेदन क्यानमा आएको छ । लिगको फ्रेन्चाइजीका लागि आएको निवदेनबारे क्यानको बोर्ड बैठकले निर्णय गर्ने छ । बोर्ड बैठक चाँडै नै बस्ने छ,” प्रवक्ता लामाले भने ।

क्यानले फ्रेन्चाइजी टिमको फारम मूल्य एक लाख रुपैयाँ राखेको थियो । साउन ३२ गतेसम्मको म्यादसहित खुलेको आवेदनमा क्यानले फ्रेन्चाइजी किन्न बिडिङ कम्पनी नेपालको कम्पनी रजिस्टारमा दर्ता भएको हुनुपर्ने कानुनी प्रावधान राखेको थियो । 

विदेशी कम्पनीको हकमा फ्रेन्चाइजीको स्वामित्व लिन चाहेमा सो कम्पनी नेपालका स्थानीय कम्पनीसँग ‘ज्वाइन्ट भेन्चर’ हुनुपर्ने क्यानले जनाएको छ । क्यानले फ्रेन्चाइजीका लागि बिडिङ गर्ने कम्पनी कुनै अपराधिक गतिविधि, आर्थिक धोखाधडी र अन्य गैरकानुनी कार्यमा दोषी ठहर भएको वा संलग्न देखिएको हुन नहुने पनि जनाएको छ ।