काठमाडौं । साफ यू–२० च्याम्पियनसिपको उपाधि भिडन्तका लागि नेपाल तयार रहेको कप्तान कुशल देउवाले बताएका छन् । नेपाली टिमले बुधबार प्रतियोगिताको फाइनलमा बंगलादेशसँग प्रतिस्पर्धा गर्ने तालिका छ । 

फाइनलको पूर्वसन्ध्यामा आयोजित पत्रकार सम्मेलनमा कप्तान कुशलले बंगलादेशले समूह चरणमा हराइसकेको भएकाले नेपाली टिम उत्साहित रहेको बताए । “हाम्रो तयारी एकदम राम्रो भइरहेको छ । पछिल्लो दुई सेसनमा हामीले हाम्रो योजनालाई राम्रो गरिरहेका छौँ । हामी फाइनलमा लागि तयार छौँ । बंगलादेशसँग समूह चरणमा राम्रो प्रदर्शन गरेका थियौँ,” कप्तान कुशलले भने । 

प्रतियोगिताको समूह चरणमा नेपालले बंगलादेशविरुद्ध २–१ को जित निकालेको थियो । समूह ‘ए’ दुवै खेलमा जितसहित विजेता बन्दै सेमिफाइनल आएको नेपालले अन्तिम–४ मा भुटानको चुनौती पन्छाएको थियो । 

यता, समूह ‘ए’ कै उपविजेता बंगलादेशले भने सेमिफाइनलमा साविक विजेता भारतलाई पेनाल्टी सुटआउटमा निराश बनाएको थियो । नेपाली टिमका प्रशिक्षक उर्जन श्रेष्ठ प्रतियोगिताको फाइनल पनि सातदोबाटोस्थित एन्फा मुख्यालयमा हुँदा नेपाली टिमलाई सहज हुने बताउँछन् ।

“हामीले प्रतियोगिताको सबै तयारी यही मैदानमा गरेको भएर यहाँ खेल्न सहज हुन्छ जस्तो लाग्छ । रंगशालामा धेरै खेलाडीहरूले खेलेका छैनन् । त्यहाँ आउने समर्थकअघि खेल्न पनि उनीहरूलाई गाह्रो हुन्थ्यो । टिमका धेरै खेलाडीहरूलाई बाक्लो दर्शकअघि खेलेको अनुभव छैन,” प्रशिक्षक श्रेष्ठले भने । 

प्रतियोगिता सुरु हुनुअघि सबै खेल त्रिपुरेश्वरस्थित दशरथ रंगशालामा हुने तालिका थियो । तर, प्रतियोगिताका लागि दशरथ रंगशालाको स्थिति खेल्न योग्य नरहेपछि सबै खेल सातदोबाटोस्थित एन्फा मुख्यालयमा सारिएको हो । प्रतियोगिताको यस संस्करणमा नेपाल र बंगलादेशसँगै भारत, श्रीलंका, माल्दिभ्स र भुटान गरी ६ टिमको सहभागिता थियो । दक्षिण एसियाकै अर्को राष्ट्र पाकिस्तानले अन्तिम समयमा सहभागी हुन नसक्ने जनाएपछि ६ टिमले प्रतिस्पर्धा गरेका हुन् ।