काठमाडौं । सरकारले संघअन्तर्गतका ठूला अस्पतालहरूमा दुई सिफ्ट बहिरंग (ओपीडी) सेवा सञ्चालन गर्ने तयारी गरेको छ । स्वास्थ्य तथा जनसंख्यामन्त्री प्रदीप पौडेलले ठूला अस्पतालहरूमा बिरामीको चापलाई मध्यनजर गर्दै यस्तो तयारी गरिएको बताएका छन् । 

अहिलेकै जनशक्तिबाट दुई सिफ्ट ओपीडी सेवा प्रवाह गर्ने मन्त्रालयको योजना छ । साथै नियमित समयभन्दा अतिरिक्त समयमा पनि शल्यक्रिया र परीक्षणहरू गर्ने व्यवस्था मिलाउनेगरी मन्त्रालयले गृहकार्य गरिरहेको छ ।  

आर्थिक वर्ष २०८१/०८२ को निति तथा कार्यक्रममा वीर, ट्रमा र कान्ति बाल अस्पतालबाट दुई सिफ्टमा ओपीडी सेवा सञ्चालन गर्ने उल्लेख छ । मन्त्री पौडेललाई यही नीति कार्यान्वयन गर्नका निम्ति भन्दै गएको साउन ४ गते संघस्तरका अस्पताल तथा प्रतिष्ठानहरूमा दुई सिफ्टमा ओपीडी सेवा सञ्चालन गर्ने निर्णय गरेका थिए । 

यसबारे अस्पताल तथा प्रतिष्ठानहरूसँग छलफल गरी मन्त्रालयबाट पत्राचार समेत भइसकेको छ । दिउँसो ४ बजेपछि पनि ओपीडी सेवा दिने र परीक्षण तथा शल्यक्रिया सेवा राति ८ बजेसम्म सुचारु गर्ने मन्त्री पौडेलको प्रस्ताव छ । 

“हामीसँग पर्याप्त नभए पनि दक्ष जनशक्ति छन्, यो क्षमतालाई सेवाभावमा बदलौँ, उपकरणलाई पूर्ण क्षमतामा चलाऔँ,” मन्त्री पौडेलले सोमबार परोपकार प्रसूति तथा स्त्रीरोग अस्पतालको वार्षिकोत्सव कार्यक्रममा भने । 

यसरी अतिरिक्त समय ड्युटी गर्ने चिकित्सक/स्वास्थ्यकर्मी तथा कर्मचारीलाई प्रोत्साहन भत्ता उपलब्ध गराउने मन्त्रालयको योजना छ । “इन्सेन्टीभका निम्ति आर्थिक स्रोत जुटाउन उर्जा मन्त्रालयसँग छलफल भइरहेको छ, अस्पतालहरूले खपत गर्ने विद्युत्को आधा महसुल मिनाहा गर्न सकिन्छ की भनेर उर्जालाई पत्राचार गरेका छौँ,” मन्त्री पौडेलले भने । 

विद्युत् प्राधिकरणले सो प्रस्ताव स्वीकृत गरे त्यति नै रकम मन्त्रालयले थप गरेर प्रोत्साहन भत्ता प्रदान गर्ने योजना रहेको उनले बताए । 

दुई सिफ्टमा ओपीडी सञ्चालन गर्दा अस्पतालहरूमा हाल चलिरहेको एक्स्टेन्डेड हेल्थ सर्भिस् (इएचएस) भने बन्द गर्ने मन्त्रालयको योजना छ । हाल परोपकार प्रसूति तथा स्त्रीरोग अस्पताल, पाटन अस्पताल, त्रिवि शिक्षण अस्पताल, कान्ति बाल अस्पताल लगायतले दिउँसो ३ बजेपछि ईएचएस सेवा प्रवाह गरिरहेका छन् । 

इन्सेन्टीभबारे मापदण्ड निर्धारण गर्न मन्त्रालयले नेपाल चिकित्सक संघका पूर्वअध्यक्ष समेत रहेका डा. लोचन कार्कीको संयोजकत्वमा पाँच सदस्यीय समिति गठन गरेको थियो । 

समितिले अतिरिक्त समय काम गर्ने चिकित्सक स्वास्थ्यकर्मीहरूरुको पारिश्रमिक, अतिरिक्त सेवा भत्ता, सार्वजनिक बिदामा काम गर्दाको दिनको भत्ता लगायतलाई समेटेर रिपोर्ट तयार पारेको छ । 

चिकित्सक स्वास्थ्यकर्मीको पारिश्रमिक बढाउने तथा कार्यसम्पादनका आधारमा इन्सेन्टीभ बढाउनेगरी समितिले सिफारिस गरेको संयोजक डा. कार्कीले बताए । यही रिपोर्टमा अतिरिक्त ड्युटी गरेबापतको अंकभार पनि निर्धारण गरिएको छ । 

रिपोर्टले एक स्वास्थ्य संस्था एक चिकित्सक/स्वास्थ्यकर्मीको अवधारणालाई पनि कार्यान्वयन गर्न सहज हुने डा. कार्कीको बुझाइ छ । समितिले बुधबार मन्त्रीसमक्ष रिपोर्ट पेस गर्दै छ । 

हाल सार्वजनिक बिदाका दिनमा समेत केही अस्पतालले हाफ ओपीडी सेवा प्रवाह गरिरहेका छन् । तर, त्यसबापत चिकित्सक/स्वास्थ्यकर्मीले कुनै भत्ता र सेवा सुविधा नपाएको परोपकार प्रसूति तथा स्त्रीरोग अस्पतालका निर्देशक डा. श्रीप्रसाद अधिकारीले बताए । 

मन्त्रालयले इन्सेन्टीभको व्यवस्था गरेमा अहिलेकै जनशक्तिले पनि दुई सिफ्ट ओपीडी सेवा सञ्चालन गर्न सम्भव रहेको उनको भनाइ छ ।