काठमाडौं । प्रश्न गर्ने सांसदकै ‘झाँको झार्ने’ विगत पहिचान बदल्दै संयमित जवाफ दिने शैलीमा देखिएका छन्, प्रधानमन्त्री केपी शर्मा ओली । 

उनी नेपाली कांग्रेससँग गठबन्धन सरकार बनाएपछि दोस्रोपटक प्रतिनिधिसभामा प्रत्यक्ष प्रश्नोत्तरमा जवाफ दिन बिहीबार रोस्टममा उभिएका थिए । चौथो कार्यकाल प्रधानमन्त्री बनेपछि उनी साउन ६ गते पहिलोपटक प्रश्नोत्तरमा सहभागी भएका थिए ।

सभामुख देवराज घिमिरेका अनुसार, ओलीसँग प्रश्नोत्तरमा १३ सांसदले प्रश्न सोध्ने कार्यक्रम राखिएको थियो । प्रश्न सोध्ने सूचीमा सुरुमा नाम भएका राष्ट्रिय प्रजातन्त्र पार्टी (राप्रपा)का सांसद ध्रुबबहादुर प्रधान सहभागी भएनन् । बाँकी १२ सांसदले लिखित प्रश्न सोधे ।

प्रधानमन्त्रीले लिखित र आवश्यकताअनुसार मौखिक जवाफ दिए । ओलीले प्रश्नको जवाफ दिइसकेपछि प्रश्नोत्तरको समय लामो भएकोमा असन्तुष्टि पनि व्यक्त गरे ।

प्रतिनिधिसभा नियमावलीमै प्रश्नोत्तरको समय एक घण्टा तोकिएको छ । आजको प्रश्नोत्तर दुई घण्टाभन्दा लामो भयो । प्रधानमन्त्री ओलीले प्रश्नको जवाफ सकेपछि प्रश्नोत्तर लामो भएकामा ओली स्वयंले असन्तुष्टि व्यक्त गरे । त्यसका अतिरिक्त उनले प्रश्न, प्रश्नजस्तो नभएको पनि टिप्पणी गरे ।

“मेरो आग्रह छ, यति लामो प्रश्नोत्तर चलाउनुहुँदैन, संसद्‌मा । प्रश्न यति लामो पनि हुनुहुँदैन । प्रश्न भनेको एक मिनेटभित्र गर्ने हो । तीन मिनेटमा जवाफ दिन सक्ने हुनुपर्छ । १३ वटा प्रश्नलाई साढे दुई घण्टाजति लाग्यो । प्रश्न, प्रश्न नै गरौँ । जवाफ, जवाफकै रूपमा दिन पाइयोस्,” उनले भने ।

उनी अघिल्लो कार्यकालमा प्रधानमन्त्री हुँदा सदनमा लामो मन्तव्य दिने गरेका थिए । उनको जवाफमा कटाक्ष, आवेग पनि समावेश हुन्थ्यो । तर, चौथो कार्यकालमा उनले त्यो रूप देखाएका छैनन् । सार्वजनिक कार्यक्रममा पनि उनले खासै कटाक्ष गरेको देखिँदैन । उनका निकटस्थहरू यसपटक प्रधानमन्त्रीले संयमित हुन खोजेको बताउँछन् ।

नारायण खड्काको प्रश्न खुट्याउनै सकस 

राप्रपा सांसद ध्रुवबहादुर प्रधान उपस्थित नभएपछि आजको बैठकमा पहिलो प्रश्न नेपाली कांग्रेसका सांसद नारायण खड्काले सोधे । उनले प्रधानमन्त्री ओलीलाई बधाई दिँदै जवाफ मिश्रित प्रश्न सोधे । सभामुख घिमिरेका अनुसार, उनले ९ मिनेट ३० सेकेन्डको प्रश्न सोधे । उनले नै लामो समय खर्चिएपछि सभामुखले पनि छोटो प्रश्न गर्नुपर्ने बताए ।

खड्काको प्रश्नको जवाफ दिने क्रममा ओलीले उनको प्रश्न खुट्याउनै गाह्रो परेको भन्दै कटाक्ष गरे । “माननीय सदस्यले प्रश्न कहाँनेर गर्नुहुन्छ भनेर ध्यानपूर्वक सुनिरहेको थिएँ । खासमा प्रश्न फेला पार्नै मुस्किल पर्‍यो,” प्रधानमन्त्री ओलीले भने, “यो प्रश्नभन्दा पनि सुझावपत्र जस्तो छ, यसमा प्रश्नमा भन्दा पनि सोलुसन (समाधान) आफैँमा आएको छ ।”

भ्रष्टाचारको विषय कार्यसम्पादन सम्झौतामा पनि राखिने

प्रधानमन्त्री ओलीले भ्रष्टाचारमा शून्य सहनशीलताको नीति कार्यान्वयन गर्न मन्त्रीसँगको कार्यसम्पादन सम्झौतामा उल्लेख गरिने जानकारी दिएका छन् । खड्का प्रश्नको जवाफ दिने क्रममा ओलीले भ्रष्टाचारजन्य गतिविधिलाई निर्मूल पार्न लिएको शून्य सहनशीलताको नीति देखावटी नभएको दाबी गरे । 

“सरकारले कुनै ‘एस्क्युज’ खोज्दैन, काम गर्छ । भ्रष्टाचारजन्य गतिविधिलाई निर्मूल पार्न हामीले लिएको शून्य सहनशीलताको नीति मौखिक प्रतिबद्धतामात्रै र बनावटी, देखावटी होइन,” ओलीले भने । 

भ्रष्टाचार नियन्त्रणमा कानुनी अनुसन्धान र नतिजामुखी हुनुपर्ने ओलीको भनाइ छ । “अब माननीय मन्त्रीज्यूहरूसँग गरिने कार्यसम्झौतामा समेत यस विषयलाई स्पष्टरूपमा समावेश गर्ने तयारी गरिएको छ,” प्रधानमन्त्रीले भने, “भ्रष्टाचार नियन्त्रण कार्यमा कठोररूपमा सम्पूर्ण नियमनकारी निकायहरूसँग समन्वय र सहजीकरण गरिने छ ।”

'संविधान संशोधन साझा सवाल, आँट देखाउन जरुरी छैन'

बैठकमा सांसद नारायणी शर्माले संविधान संशोधन गर्दा प्रत्यक्ष निर्वाचित कार्यकारी प्रमुख र पूर्ण समानुपातिक संसद्को व्यवस्था गर्ने आँट गठबन्धन सरकारको छ ? भनेर सोधेकी थिइन् । उनको प्रश्नको जवाफमा प्रधानमन्त्रीले देश, जनता, सुशासनको पक्षमा अघि बढाउन आवश्यक पर्ने कुरा गरिने बताए । 

संविधान संशोधन गर्ने विषयमा आँट देखाएर उल्किन जरुरी नरहेको भनाइ ओलीको छ । “हामी कसैले आँट गर्ने, कसैले आँट गर्छ कि गर्दैन भनेर हेर्ने होइन, यो । आँट गर्न परे सबैले गरौँला, नपरे कसैले नगरौँला । यो साझा सवाल हो,” ओलीले भने ।

विद्यार्थीमाथि प्रतिप्रश्न 

प्रधानमन्त्री ओलीले विद्यालय, विश्वविद्यालयमा आफैँ ताला लगाएर शान्ति भएन भन्ने भनी प्रतिप्रश्न गरे । शिक्षामन्त्री विद्या भट्टराईले त्रिभुवन विश्वविद्यालका असुरक्षित भएको भन्दै सामाजिक सञ्जालमा स्ट्टाटस लेखेपछि उक्त विषयले तरंग पैदा गरेको छ । त्रिविका पदाधिकारीमाथि हमला गर्न खोजेको र धम्की दिएको भन्दै मन्त्रीले सुरक्षाको माग गरेकी थिइन् ।

त्यही विषयप्रति इङ्गित गर्दै प्रधानमन्त्रीले आफैँ ताला लगाउने अनि पढाइ भएन भन्ने भनी प्रश्न सोधे । “ताला अरूले लगाउन आउने त होइन, आफैँ ताला लगाउने अनि पढाइ भएन भन्ने ? विद्यालय, विश्वविद्यालय, महाविद्यालय शान्ति क्षेत्र हुनुपर्ने,” ओलीले भने, “ती ठाउँमा अशान्ति आफैँ गराउने अनि फेरि शान्ति भएन भन्ने ? त्यस्ता तरिका हरेकले छाड्नुपर्छ ।”

उनले व्यवस्थापन, शिक्षक, अभिभावकलगायत हरेक पक्ष जिम्मेवार हुनुपर्ने बताए ।  शिक्षामा भएको समस्या समाधानका लागि जिम्मेवार भएर लाग्नुपर्ने ओलीको भनाइ छ । 

प्रधानमन्त्रीको प्रस्टीकरण– सरकार र प्राधिकरणबीच मतभेद छैन 

प्रश्नोत्तरका क्रममा ओलीले सरकार र विद्युत् प्राधिकरणबीच मतभेद नरहेको दाबी गरे । “सरकार र विद्युत् प्राधिकरणबीच कुनै मतभेद छैन । तर, सरकारले प्राधिकरणलाई निर्देशन गर्नै हुन्न भन्ने छैन,” ओलीले भने, “सोधीखोजी पनि गर्न पाइँदैन ? सरकारले सोधिखोजी गर्छ ।”

उनले डेडिकेटेड र ट्रंकलाइनको महसुल मिनाहा गर्न लागेको भन्ने प्रचार झुटो भएको पनि बताए । “बक्यौता उठाउँछौँ, तर उद्योग चलाएर,” ओलीले भने । 

'झापामा भ्यू टावर बनाएको होइन'

प्रधानमन्त्री ओलीले झापाको दमकमा भ्यूटावर नबनाएको दाबी गरे । राष्ट्रिय स्वतन्त्र पार्टी (रास्वपा)का सचेत निशा डाँगीको प्रश्नको जवाफ दिँदै ओलीले बिजनेस कम्प्लेक्स बनाइएको बताए । झापामा टावर बनाएको विषयले निकै चर्चा पाएको थियो ।

“दमकमा एउटा बिजनेस कम्प्लेक्स बनेको छ । त्यसको उचाइ करिब ७२ मिटर होला । अग्लो भएकाले त्यसलाई टावर भने । माथिबाट हेर्दा टाढासम्म देखिने रहेछ भनेर भ्युटावर भने,” उनले भने, “त्यो बिजनेस कम्प्लेक्स हो । पाँच बिगाहा जमिनमा त्यो टावर बनेको छ । त्यसमा चारवटा कि ६ वटा लिफ्ट छन् ।”

यसका हरेक तलामा विभिन्न किसिमका बिजनेस चल्न सक्ने प्रधानमन्त्री ओलीले बताए । उनले थाइल्यान्ड र मलेसियामा टावर बनाउँदा सरकारले गाली खाएको उनले सम्झिए । हालका लागि यसलाई ‘झापा ट्रेड टावर’ भनेर बुझ्न सकिने पनि उनको भनाइ छ । उनले यसको कुल लागत एक अर्ब ७९ करोड ४८ लाख भएको जानकारी पनि गराए । 

तस्बिरहरू : हरिशजंग क्षेत्री/बाह्रखरी