काठमाडौं । मुख्यसचिव लीलादेवी गडतौलाले बजेटको सफल एवं प्रभावकारी कार्यान्वयन अपरिहार्य रहेको बताएकी छन् । नेपाल उद्योग परिसंघले बुधबार आयोजना गरेको ‘सीएनआई बजेट वाच’ कार्यक्रममा उनले बजेट वाच पहलमार्फत परिसंघले सरकार एवं निकायहरूलाई सहयोग गरेको बताइन् ।

उनले चालु आर्थिक वर्षको बजेट कार्यान्वयन अन्य आर्थिक वर्षको तुलनामा प्रभावकारी हुने पनि बताइन् ।

परिसंघका अध्यक्ष राजेशकुमार अग्रवालले बजेटको सफल कार्यान्वयनबाट नै पुँजीगत खर्च बढ्ने, बजेटले निर्दिष्ट गरेको लक्ष्य हासिल हुने, नीतिगत सुधार हुँदै समग्र अर्थतन्त्रको विस्तार हुने बताए । उनले आत्मनिर्भर अर्थतन्त्र निर्माण गर्न बजेटको सफल कार्यान्वयन अत्यावश्यक रहेको बताए ।

सेजनका निवर्तमान अध्यक्ष जनार्दन बरालले गत आर्थिक वर्षको बजेटमा निजी क्षेत्रसँग सम्बन्धित ७३ वटा बुँदा मध्ये १८ वटा बुँदा अर्थात् २५ प्रतिशत पूर्ण कार्यान्वयन भएको बताए । यस्तै, ५१ वटा अर्थात् ७० प्रतिशत बुँदा आंशिक कार्यान्वयन भएको र चारवटा अर्थात् ५ प्रतिशत बुँदामा कुनै प्रगति नभएको तथ्यांक प्रस्तुत गरे ।

परिसंघले चालु आर्थिक वर्ष २०८१/८२ को बजेटमा घोषणा गरिएका अर्थतन्त्र एवं निजी क्षेत्रसँग सम्बन्धित विषयहरूसहितको पुस्तिका सार्वजनिक गर्दै यस वर्षको पहिलो बजेट वाच कार्यक्रम आयोजना गरेको हो ।