टेक्सास । क्राउडस्ट्राइकले हालै सफ्टवेयर अपडेटका नाममा त्रुटि गरेर आठ मिलियन (८० लाख) कम्प्युटर क्र्यास गराई विश्वभरि अराजकता निम्त्याएको भन्दै सेयरहोल्डरले मुद्दा हालेका छन् ।

उक्त कम्पनीविरुद्ध ‘सफ्टवेयर टेस्टिङ’को गलत र भ्रामक कुरा गरेको आरोप समेत लगाइएको छ । यो कारणले गर्दा कम्पनीको सेयरको मूल्य १२ दिनमा ३२ प्रतिशतले घटेको र मार्केट भ्यालु पनि २५ बिलियन डलरले कम भएको जनाइएको छ ।

क्राउडस्ट्राइकले भने उक्त आरोपको खण्डन गरेको छ । मुद्दाको प्रतिरक्षा गरिने कम्पनीले जनाएको छ ।

उक्त मुद्दा टेक्सासको अस्टिनस्थित संघीय अदालतमा पेस गरिएको छ । क्राउडस्ट्राइकका कार्यकारीले सफ्टवेयर अपडेटमा पर्याप्त टेस्ट गरिएको भनेर लगानीकर्तालाई ठगेको समेत आरोप लगाइएको छ ।

उनीहरूले उक्त कम्पनीको नोभेम्बर २९ देखि जुलाई २९ सम्मको सेयरमा क्षतिपूर्ति पनि माग गरेका छन् । क्षतिपूर्तिको रकम भने तोकिएको छैन ।

उनीहरूका अनुसार, गएको मार्च ५ मा ‘कन्फेरेन्स कल’का क्रममा कम्पनीका प्रमुख कार्यकारीले सफ्टवेयर प्रमाणित र परीक्षण गरिएको जनाएका थिए । क्राउडस्ट्राइकले सेयरहोल्डरहरूको दाबीमा प्रतिवाद गर्ने जनाएको छ ।

यसैबीच, डेल्टा एयरलाइन्सका प्रमुख कार्यकारी इद बास्टियानले आईटी अवरोधले यात्रुलाई क्षतिपूर्ति र गुमेको राजस्व समेत गरेर आफ्नो कम्पनीलाई ५०० मिलियन डलर घाटा भएको जनाएका छन् ।

डेल्टाले पनि क्राउडस्ट्राइकसँग क्षतिपूर्तिका निम्ति प्रयास गर्न वकिलको व्यवस्था गरेको बताइएको छ ।

जुलाई १९ मा भएको उक्त अवरोधका कारण विश्वभर ८.५ मिलियन माइक्रोसफ्ट विन्डोज कम्प्युटर प्रभावित भएका थिए । त्यसबाट बिजनेस, बैंक, एयरलाइन्स, अस्पताललगायत निकाय बढी प्रभावित भएका थिए । बीबीसीबाट ।