काठमाडौं । देशका केही सानाठूला नदीमा आज पनि पानीको बहाव उल्लेख्य बढ्ने अनुमान छ । ती नदीतटीय क्षेत्रमा उच्च सतर्कता अपनाउन बाढी पूर्वानुमान महाशाखाले सचेत गराएको छ ।

यस दिन अछाम, बाजुरा, दैलेख र कालीकोट भई बहने अधिकांश साना नदीमा बहाव बढ्नेछ । यी जिल्लाका केही साना नदीमा आकस्मिक बहाव हुन सक्ने अनुमान छ ।

यस्तै, रामेछाप, दोलखा, सिन्धुपाल्चोक, रुकुम पूर्व, रुकुम पश्चिम, सल्यान, बझाङ, बैतडी र दार्चुला भई बहने अधिकांश साना नदीमा पनि बहाव बढ्ने महाशाखाको अनुमान छ ।

अबका तीन दिन कोसी नारायणी, कर्णाली, महाकाली र यसका प्रमुख सहायक नदीहरूको जलसतह बढ्दो हुने तर सतर्कता तहभन्दा तलै रहने अनुमान छ । कन्काई, कमला, वाग्मती, पूर्वी राप्ती, पश्चिम राप्ती र बबई नदीको जलसतह पनि बढ्दो हुने महाशाखाको अनुमान छ ।