वासिङटन । अमेरिकाका पूर्वराष्ट्रपति बाराक ओबामाले डेमोर्क्र्याटिक पार्टीका तर्फबाट राष्ट्रपति जो बाइडेनले प्रस्ताव गरेका उमेदवार कमला ह्यारिसलाई हालसम्म समर्थन गरेका छैनन् । उनले डोनाल्ड ट्रम्पलाई जित्छिन् भन्ने ओबामालाई विश्वास नभएकाले यस्तो भएको राष्ट्रपति बाइडेनको पारिवारिक स्रोतलाई उद्धृत गर्दै न्युयोर्क पोस्टले जनाएको छ ।

राष्ट्रपति बाइडेनले गएको आइतबार अचानक राष्ट्रपति पदको उमेदवारी छोडेका थिए । लगत्तै उनले उक्त पदका निम्ति उपराष्ट्रपति कमलालाई अनुमोदन गरेका थिए ।

त्यसपछि डेमोर्क्र्याटिक पार्टीका अधिकांश ‘एलिट’ले कमलाको समर्थन गरेका  थिए । तर, ओबामा उल्लेख गर्न योग्य अपवाद भएका छन् ।

बाइडेन परिवार स्रोतले भन्यो, “ओबामा निकै निराश छन्, किनकि ह्यारिसले जित्न सक्दिनन् ।”

ओबामाका हिसाबले कमला किन योग्य नभएकी हुन् भने सीमाको भ्रमण उनले कहिल्यै गरेकी छैनन्, त्यो निकै महत्त्वपूर्ण छ । यस्तै, आप्रवासीको स्वास्थ्य बिमा हुनुपर्नेजस्ता ल्यान्डमाइन (वारुदे सुरुङ)पार गर्नुपर्ने जिम्मेवारी उनमा छ ।

यदि, कोही राष्ट्रपति पदका निम्ति दौडिरहेको छ भने उसले आफूले गर्न सक्ने र नसक्ने काम भन्न सक्ने हुनुपर्ने ओबामाले जनाएको स्रोतलाई उद्धृत गर्दै उक्त पत्रिकाले लेखेको छ ।

ट्रम्पसँगको पहिलो ‘डिबेट’ प्रतिस्पर्धामा बाइडेनको कमजोर प्रस्तुति भएको भनेर उनकै पार्टीबाट आलोचना गरिएपछि उमेदवारी छोड्न बाध्य भएका थिए । दोस्रो डिबेटको मिति सेप्टेम्बर १० का लागि तोकिएको छ ।

बाइडेनको पारिवारिक स्रोतलाई उद्धृत गर्दै उक्त पत्रिकाले कमलाबारे भनेको छ, “डिबेटसम्म पर्खिनुस्, उनले डिबेट गर्न सक्दिनन् । उनले त्यहाँ इजरायल, प्यालेस्टाइन र युक्रेन मामिलामा एकथोकलाई अर्कैथोक भन्नेछिन् । उनले वास्तवमै केही मूर्ख कुरा गर्नेछिन् ।”

पत्रिकाले स्रोतलाई उद्धृत गर्दै अगाडि भनेको छ, “ओबामालाई यो हुन्छ भन्ने थाहा छ, बाइडेनलाई पनि थाहा छ । त्यसैले उनले यो प्रश्नको जवाफ दिनुपर्ने हो ।” 

उक्त घटनाक्रमबारे ह्वाइट हाउससँग जवाफ माग्दा कुनै प्रतिक्रिया नजनाइएको समेत उल्लेख गरिएको छ ।

ओबामाले बाइडेनलाई दौडबाट बाहिर लैजान मात्र चाहेको जर्ज क्लोनीले न्युयोर्क टाइम्समा लेखेको लेखमा जनाइएको थियो । तर, बाइडेनले तत्कालै कमललाई प्रस्ताव गरेकाले ओबामा ‘स्तब्ध’ भएको जनाइएको छ ।

ओबामाले उक्त पदका निम्ति एरिजोनाका सिनेटर तथा अन्तरिक्षयात्री मार्क केलीलाई उमेदवार बनाउन चाहेको समेत स्रोतलाई उद्धृत गर्दै जनाइएको छ ।

तर, आफूले सोचेअनुसार प्रक्रिया अघि नबढेकाले ओबामा ‘क्रुद्ध’ भएको समाचारमा उल्लेख छ । त्यसैले उनले कमलालाई समर्थन नगरेको बाइडेननिकट स्रोतले बताएको छ । न्युयोर्क पोस्टबाट ।