![ड्रोन उडाएको विषयमा क्यानेडियन ओलम्पिक कमिटीले माग्यो माफी](https://12khari.top/uploads/posts/dron_ca-1721822595.png)
काठमाडौं । न्युजिल्यान्डको महिला फुटबल टिमले प्रशिक्षण गरिरहेको बेला क्यानडा फुटबलका सदस्यले ड्रोन उडाएको विषयमा क्यानेडियन ओलम्पिक कमिटीले माफी मागेको छ । यो घटना सेन्ट एटिनेमा सोमबार भएको हो ।
पेरिस ओलम्पिकअन्तर्गत समूह ‘ए’ को खेलमा क्यानडा र न्युजिल्यान्डबीच प्रतिस्पर्धा हुने तालिका छ । न्युजिल्यान्ड ओलम्पिक कमिटीका अनुसार घटनाबारे प्रहरीमा उजुरी गरिएको थियो । उजुरीकै आधारमा प्रहरीले ड्रोन नियन्त्रण गर्ने एक व्यक्तिलाई पक्राउ समेत गरेको थियो ।
यसको केही समयपछि क्यानेडियन ओलम्पिक कमिटीले अनुमति पत्र नभएको फुटबल टिमका एक सदस्य प्रहरी अधिकारीको नियन्त्रणमा भएको पुष्टि गरेको थियो । “क्यानेडियन ओलम्पिक कमिटी सदैव अनुशासित खेलको पक्षमा छ र हामी यस घटनाबारे आश्चर्यचकित र निराश छौँ । हामी न्युजिल्यान्ड फुटबल टिमप्रति, घटनाबाट प्रभावित भएका खेलाडी र न्युजिल्यान्ड ओलम्पिक कमिटीप्रति हृदयदेखि नै माफी माग्न चाहन्छौँ,” क्यानेडियन ओलम्पिक कमिटीले जारी गरेको विज्ञप्तिमा उल्लेख छ ।
क्यानडा महिला फुटबल टिमले टोकियो ओलम्पिक–२०२० मा स्वर्ण पदक जितेको थियो ।