काठमाडौं । नेपालमा प्रत्येक दिन औसत ९७ वटा सानाठूला सवारी दुर्घटना हुने गरेका छन् । ती दुर्घटनामा परी दैनिक औसत सातजनाले ज्यान गुमाउने गरेको छन् । ८८ जना घाइते हुने गरेको तथ्यांक छ ।
 
नेपाल प्रहरीका प्रवक्ता प्रहरी नायब महानिरीक्षक दानबहादुर कार्कीका अनुसार गत वर्ष ३५ हजार ४०४  वटा सवारी दुर्घटना भएका छन् । ती दुर्घटनामा दुई हजार ३६८ जनाको मृत्यु भएको छ । ६ हजार १६० गम्भीर र २५ हजार ९९६ जना साधारण घाइते भएका छन् । 

सवारी दुर्घटनामा १०१ चौपायासमेत मरेका छन् ।
 
सबैभन्दा बढी दुई पांग्रे सवारी बढी दुर्घटनामा पर्ने गरेको प्रहरीको तथ्यांक छ । गतवर्ष १९ हजार ९८४ मोटरसाइकल/स्कुटर, छ हजार ८३७ कार/जिप, दुई हजार १९३ बस, एक हजार ५२० साइकल/रिक्सा, एक हजार ४६८ ट्रक/ट्यांकर, एक हजार ४७४ टेम्पो/म्याजिक, ७८३ ट्रयाक्टर र ४०० माइक्रोबस दुर्घटना भएका थिए । रासस