जलपाइगुडी । भारतले पश्चिम बंगालको न्यू माल जंक्सनबाट बिहारको जोगवनीसम्म रेल लैजान नेपालको बाटो हुँदै जोड्ने योजना बनाएको छ । 

उत्तरपूर्वलाई मुख्य भूभागसँग जोड्न ‘चिकेन्स नेक’ समेत भनिने सिलिगुडी कोरिडोरको निर्भरता घटाउनका लागि नयाँ रेलवे लाइन बनाउने योजना बनाइएको जनाइएको छ । बंगलादेशसँग समेत यसै उदेश्यका लागि ट्रयाक बनाइने जनाइएको छ ।

फाइनल लोकेसन सर्भे (एएलएसर)मा विराटनगर र न्यू माल जंक्सनबीचको १९० किमीको रुट स्वीकृत गरिएको जनाइएको छ । प्रस्तावित गलगलिया (विहार)–भद्रपुर (नेपाल)–काजली बजार (नेपाल) सेक्सनको लागि थप १२.५ किमी रेलवे ट्रयाक जरुरी पर्ने भारतीय रेलवेको भनाइ छ । 

जोगवनी–विराटनगर ब्रोड गेज सेक्सनमा १८.६ किमी ट्रयाक भारततर्फ र १३.१५ किमी नेपालमा हुने जनाइएको छ । सो सेगमेन्टको जिम्मेवारी नेपाल सरकारले चाँडै लिने र सोसम्बन्धी काम चलिरहेको जनाइएको छ ।

भारतको अहिलेको रेल रुट भारतको मुख्य भूभागबाट उत्तरपूर्व जाँदा इश्लामपुरको अलुवाबारी सडक हुँदै जाने गरेको छ । सो क्षेत्र चिकेन्स नेकको रूपमा चिनिएको नेपाल र बंगलादेशको बीचमा स्यान्डबीचको रूपमा रहेको २२ किमी चौडा क्षेत्र हुँदै जान्छ ।  

अलुवाबारीबाट रेल न्यूजलपाइगुडी जंक्सन वा सिलगुडी जंक्सनतर्फ जाने गरेको छ । चिकेन्स नेकको निर्भरता घटाउन नेपाल र बंगलादेश हुँदै भारतीय रेलवेले १४ वटा फाइनल लोकेसन सर्भे (एफएलएस) स्वीकृत गरेको भारतीय रेलवेका चिफ पब्लिक रिलेसन अफिसर सब्यसाची डेले जनाएका छन् । टाइम्स अफ इन्डिया