काठमाडौं । कोपा अमेरिका–२०२४ को फाइनल कोलम्बियाविरुद्ध मैदान उत्रिँदा अर्जेन्टिना कीर्तिमानी १६औँ उपाधिको लक्ष्यमा हुनेछ । सोमबार बिहान हुने खेलमा जित निकाले साविक विजेता अर्जेन्टिनाले प्रतियोगिताको सबैभन्दा धेरै उपाधि जित्ने टिमको सूचीबाट उरुग्वेलाई पछि पार्नेछ ।

सन् २०२१ को कोपा अमेरिका र २०२२ को फिफा विश्वकप च्याम्पियन बनिसकेको अर्जेन्टिनाले ऐतिहासिक ‘तेहेरो’ उपाधिको खोजीमा छ । यसअघि विश्व फुटबलमा स्पेनले लगातार तीन उपाधिसहित कीर्तिमान बनाएको छ । स्पेनले सन् २००८ को युरोपियन च्याम्पियनसिप, २०१० को फिफा विश्वकप र २०१२ को युरो जितेको थियो ।

“हामी सधैँ एकनासको प्रदर्शन गर्ने प्रयास गर्छौं । यो टिमको समन्वय एउटै छ, र यो सबैभन्दा महत्त्वपूर्ण कुरा हो । हामी फाइनल जित्ने प्रयास गर्ने छौँ । हाम्रो फुटबल खेल्ने शैली परिवर्तन हुँदैन । तर, फाइनल सधैँ विशेष हुन्छ,” लियोनल स्कालोनीले भने ।

यता, अर्कोतर्फ कोलम्बिया २३ वर्षपछि पहिलो महादेशीय उपाधिको खोजीमा छ । यसअघि कोलम्बियाले सन् २००१ मा पहिलो पटक र हालसम्मको एकमात्र उपाधि जितेको थियो । कोलम्बिया त्यसबेला प्रतियोगिताको आयोजक थियो ।

सेमिफाइनलमा ड्यानियल मुनोजले रातो कार्ड पाए पनि कोलम्बियाले उरुग्वेविरुद्ध १–० को जित निकालेको थियो । कोलम्बिया पछिल्लो २८ खेलयता अपराजित छ । पछिल्लो पटक कोलम्बियाले सन् २०२२ को फेब्रुअरीमा अर्जेन्टिनासँग नै हार बेहोरेको थियो ।

“हाम्रो प्रतिद्वन्द्वी को हो भन्ने हामीलाई थाहा छ । तर, हामी उत्प्रेरित रहन आवश्यक छ । हामीले यो फरक खेल हो भन्ने बुझ्न आवश्यक छ,” कोलम्बियन प्रशिक्षक नेस्टोर लोरेन्जोले भने, “हामीले गरेको सबै कुरामा जित दिलाउन सक्ने खेल हो यो । हामीसँग यसमा रमाउने अवसर छ । र, हामीसँग यो अवसर विश्व विजेताविरुद्ध छ ।”

कोलम्बियाको सफलतामा जेम्स रोड्रिगेज प्रमुख हतियार बनेका छन् । जारी प्रतियोगितामा उनले कोपा अमेरिकाको एक संस्करणमा सर्वाधिक असिस्ट गर्ने मेसीको कीर्तिमान तोडेका छन् । कोलम्बियाले फाइनलसम्मको यात्रा तय गर्दा रोड्रिगेजले कुल ६ असिस्ट गरेका छन् ।

“लोरेन्जोले रोड्रिगेज वरपर रहेर कसरी योजना बनाउने भन्ने रणनीति भेट्टाएका छन् । रोड्रिगेज टिममा हुनु भनेको उत्कृष्ट खेलाडीको साथ हुनु हो । तर, हामी कहिल्यै पनि एउटा खेलाडीमा केन्द्रित हुँदैनौँ । हामी टिममा केन्द्रित हुन्छौँ,” अर्जेन्टिनी प्रशिक्षक स्कालोनीले थपे ।

सेमिफाइनलमा क्यानडाविरुद्ध २–० को जित निकाल्दा प्रतियोगिताकै पहिलो गोल गरेका मेसी फाइनलमा जितसहित आफ्नो प्रख्यात करियरमा अर्को उपाधि थप्ने लक्ष्यमा हुनेछन् । सन् २०२१ मा पहिलो अन्तर्राष्ट्रिय उपाधि जित्नुअघि मेसीले आफ्नो करियरमा चार मुख्य प्रतियोगिताको फाइनल गुमाएका थिए । उनले २००७ , २०१५ र २०१६ को कोपा अमेरिकासँगै २०१४ को विश्वकप फाइनलमा पनि हार भोगेका थिए ।