इस्लामावाद । पाकिस्तानका पूर्वप्रधानमन्त्री इमरान खानलाई गैरकानुनी विवाहको अभियोगमा दोषी ठहर गरिएको मुद्दालाई पाकिस्तानको एक अदालतले शनिबार उल्ट्याएको छ । फेब्रुअरीको चुनावअघि नै दोषी ठहर गर्दै सत्तामा फर्कन नदिन मुद्दा चलाइएको उनको भनाइ छ ।

खानविरुद्धका सबै मुद्दा अब कम्तीमा आंशिक रूपमा भए पनि फिर्ता भएको छ । राजद्रोहको अभियोगमा अप्रिलमा एक दशकको जेल सजायलाई उल्ट्याइएको थियो । जुनमा १४ वर्षको भ्रष्टाचारको सजाय निलम्बन गरिएको थियो । उनीमाथि लगाइएका कतिपय आरोप अझै पनि कायम छ ।

पूर्वप्रधानमन्त्री खान र उनकी पत्नी बुशरा बीबीलाई इस्लामिक कानुनको उल्लंघन गर्दै सम्बन्धविच्छेद भएको केही समयपछि विवाह गरेको आरोपमा सात वर्षको जेल सजाय सुनाइएको थियो । तर, इस्लामावाद अतिरिक्त जिल्ला अदालतका न्यायाधीश अफजल माजोकाले शनिबार खान र बीबी दुवैको अपिल स्वीकार गरिएको घोषणा गरेका छन् ।

यसैबीच, पूर्वप्रधानमन्त्री खानले सन् २०२३ मेमा दंगा भड्काएको आरोपमा पूर्वी लाहोरको एक अदालतले उनलाई पक्राउ गर्न अनुमति दिएको उनको पार्टी पाकिस्तान तेहरिक–ए–इन्साफ (पीटीआई) का प्रवक्ता अहमद जान्जुआले बताए । प्रवक्ता जान्जुआले एक विज्ञप्ति जारी गर्दै थुनामा राख्ने गैरकानुनी आदेशलाई लम्ब्याउने अर्को ‘नौटंकी’ भएको उल्लेख गरेका छन् ।

यसै महिनाको सुरुमा संयुक्त राष्ट्रसंघका विज्ञको एक समितिले खानलाई हिरासतमा लिनुमा कुनै कानुनी आधार नभएको र उनलाई राजनीतिक पदका निम्ति अयोग्य ठहर्‍याउने उद्देश्यले गरिएको देखिएको जनाएको थियो ।

“सुरुदेखि नै त्यो अभियोजन कानुनमा आधारित थिएन र राजनीतिक उद्देश्यका लागि प्रयोग गरिएको थियो,” जान्जुआद्वारा हस्ताक्षरित विज्ञप्तिमा भनिएको छ, “करिब एक वर्ष जेलमा बिताएपछि उनलाई तत्काल रिहा गर्न माग गरिएको छ ।”

खानप्रति वफादार उमेदवारहरूले राष्ट्रिय चुनावमा सबैभन्दा बढी सिट जितेका थिए । तर, सेनानिकट मानिएका प्रतिद्वन्द्वी दलहरूको गठबन्धनले उनीहरूलाई सरकारबाट बाहिर राखेको थियो ।

खानले सन् २०१८ देखि २०२२ सम्म प्रधानमन्त्रीका रूपमा काम गरेका थिए । रासस/एएफपी