काठमाडौं । मोरङमा हत्या आरोपमा प्रहरीले श्रीमान्–श्रीमतीलाई पक्राउ गरेको छ । पक्राउ पर्नेमा उर्लाबारी नगरपालिका–४, हाटखोलाका ३६ वर्षीय छिरिङ भनिने सुनील तामाङ र उनकी श्रीमती ३३ वर्षीया प्रनिसा पाँचकोटी छन् ।

मोरङकै सुन्दरहरैँचा नगरपालिका–९ का ४९ वर्षीय सहदेव बजगाईंको हत्या गरेको आरोपमा उनीहरूलाई पक्राउ गरिएको हो । गएको बिहीबार राति उनीहरूलाई नियन्त्रणमा लिइएको प्रहरी प्रधान कार्यालयले जानकारी गराएको छ ।

सुन्दरहरैँचा–१, कुमारगाउँस्थित आफ्नै कुखुरा फार्ममा सहदेव बिहीबार बिहान मृतावस्थामा फेला परेका थिए । घटनाको अनुसन्धानका क्रममा इलाका प्रहरी कार्यालय बेलबारीबाट खटिएको टोलीले उक्त फार्ममा काम गर्ने सुनील र उनकी श्रीमतीलाई पक्राउ गरेको हो ।

फार्म सञ्चालक र सुनीलबीच पारिश्रमिकका विषयमा बुधबार राति विवाद भएको थियो । त्यसक्रममा उनीहरूले बन्चरो र फलामको दाउ प्रहार गरी सहदेवको हत्या गरेको प्रारम्भिक अनुसन्धानका क्रममा खुलेको प्रहरीले जनाएको छ ।

आरोपितविरुद्ध कर्तव्य ज्यान मुद्दामा मोरङ जिल्ला अदालतबाट म्याद थप अनुमति लिई प्रहरीले अनुसन्धान गरिरहेको छ ।