काठमाडौं । सर्वाेच्च अदालतले धितोपत्र बोर्ड अध्यक्ष सिफारिश प्रक्रिया रद्द नगर्न अल्पकालीन आदेश दिएको छ । सरकारले पुरानो प्रक्रिया रद्द गरेपछि अन्तर्वार्ता र प्रस्तुतीकरणमा सहभागी सन्तोषनारायण श्रेष्ठले सर्वाेच्चमा रिट दायर गरेका थिए ।
त्यही रिटका आधारमा अल्पकालीन आदेश जारी गरेको थियो । उता सरकारले भने पुरानो प्रक्रिया रद्द गर्दै अध्यक्ष छनोट गर्न पुरानै समितिलाई निरन्तरता दिएको थियो ।
सरकार परिवर्तन हुने भएपछि नयाँ आउने सरकारले अध्यक्षको छनोट प्रक्रिया अगाडि बढाउने गरी हालको समिति निस्क्रिय छ । राष्ट्रिय योजना आयोग स्रोतका अनुसार, अध्यक्ष सिफारिस समितिका संयोजक (राष्ट्रिय योजना आयोगका उपाध्यक्ष) डा. मिनबहादुर श्रेष्ठ अमेरिका गएका छन् ।
संयोजक श्रेष्ठ साउन ४ गते मात्र स्वदेश फर्कने तालिका छ । संयोजक श्रेष्ठ नेपाल फर्कदा सरकार परिवर्तन हुने भएकाले आगामी शुक्रबारपछि बन्ने सरकारले धितोपत्र बोर्डको अध्यक्ष छनोटको प्रक्रिया अगाडि बढाउने छ ।
एमालेले सरकारलाई दिएको समर्थन फिर्ता लिएपछि प्रधानमन्त्री पुष्पकमल दाहाल ‘प्रचण्ड’ले आगामी शुक्रबार संसद्मा विश्वासको मत लिने कार्य तालिका छ ।
संसद्का दुई ठूला पार्टी नेपाली कांग्रेस र एमालेले मिलेर सरकार बनाउने भएपछि प्रधानमन्त्री अल्पमतमा छन् । तैपनि उनी विश्वासको मत लिएरै छाड्ने तयारीमा छन् । उनले संसद्मा बोलेर राजीनामा दिएमा नयाँ सरकार गठन गर्ने बाटो खुल्नेछ । त्यसपछि मात्र बोर्ड अध्यक्ष छनोट प्रक्रिया अगाडि बढ्ने बताइएको छ ।
बोर्डका अध्यक्षका लागि सर्टलिस्टमा परेका पाँच जनामध्ये सन्तोषनारायण श्रेष्ठ र मुक्तिनाथ श्रेष्ठ मात्र प्रस्तुतीकरण तथा अन्तर्वार्तामा सहभागी भएका थिए । अध्यक्ष छनोट समितिले प्रस्तुतीकरण र अन्तर्वार्तामा सहभागी दुईसहित कृष्णबहादुर कार्की, चिरञ्जिवी चापागाईं र डा. नवराज अधिकारीलाई सर्टलिस्टमा पारेको थियो ।
सरकारले गत माघ ३ गते राष्ट्रिय योजना आयोगका उपाध्यक्ष श्रेष्ठको संयोजकत्वमा तीन सदस्यीय सिफारिश समिति गठन गरेको थियो ।