काठमाडौं । चितवनमा निमार्णाधिन गौतम बुद्ध अन्तर्राष्ट्रिय क्रिकेट रंगशाला निमार्णका निम्ति भरतपुर महानगरपालिकाले हिमालयन कालिञ्चोक बीबीआर जेभीसँग सम्झौता गरेको छ ।

महानगरले सोमबार ३२ महिनाभित्र रंगशालाको पहिलो चरणको निमार्णका लागि कालिञ्चोक बीबीआर जेभीसँग सम्झौता भएको उपनिर्देशक जगन्नाथ अर्यालले बताए । 

सम्झौतामा महानगरका प्रमुख प्रशासकीय अधिकृत लक्ष्मीप्रसाद पौडेल र कालिञ्चोक बीबीआर जेभीका तर्फबाट विकास गौतमले हस्ताक्षर गरेका हुन् । सम्झौताअनुसार रंगशालाको पहिलो चरणको काम २०८३ पुस २२ गतेसम्म सम्पन्न गरिसक्नुपर्नेछ । 

उपनिर्देशक अर्यालका अनुसार महानगरपालिकाले कम्पनीसँग भ्याट र पीएसबाहेक ६८ करोड रुपैयाँमा सम्झौता गरेको हो । 

रंगशालाको पहिलो चरणमा १० हजार दर्शक क्षमताको स्टयान्ड, मैदानको सम्पूर्ण काम, पेभेलियनसहित दुईवटा टावर बिल्डिङ र पाँच वटा पिच निर्माण हुनेछ ।

“रंगशालाको आधारभूत निर्माणका लागि सोमबार सम्झौता भएको छ । जसमा कम्पनीले ड्रिनएजसहितको प्रविधिबाट मैदान र पीच निमार्ण र प्यारापिटका कामहरु गर्नुपर्ने छ,” अर्यालले बाह्रखरीसँग भने ।

यसअघि धुर्मुस–सुन्तली फाउन्डेसनले अभियान सञ्चालन गरेर रंगशाला निमार्ण सुरु गरे पनि बजेट अभावका कारण २०७७ साउनदेखि मैदानको काम ठप्प बनेको थियो । बजेट अभाव बनेपछि फाउन्डेसनले रंगशालाको स्वामित्व ग्रहण गर्न सरकारलाई आग्रह गरेको थियो । यसपछि २०७९ चैतमा मन्त्रिपरिषद्को बैठकले मैदान सरकारले बनाउने निर्णय गरेको थियो ।

फाउन्डेसनले काम ठप्प हुनुअघि मैदानको निर्माणका ३५ प्रतिशत काम सम्पन्न भइसकेको छ । यसक्रममा ५७ करोड ९२ लाख रुपैयाँ खर्च भएको फाउन्डेसनले जनाएको छ । फाउन्डेसनका अनुसार सोमध्ये नगद र जिन्सी गरी ३९ करोड ८० लाख रुपैयाँ उठेको थियो । 

सरकारले २०८० कात्तिक २३ गते काठमाडौंस्थित तल्लो मुलपानी रंगशाला र मोरङको गिरिजाप्रसाद कोइराला क्रिकेट रंगशालासँगै चितवनको गौतमबुद्ध अन्तर्राष्ट्रिय क्रिकेट रंगशालालाई पनि राष्ट्रिय गौरवको आयोजनामा समेटेको थियो ।