काठमाडौं । लुम्बिनी लायन्सले पूर्वराष्ट्रिय क्रिकेट खेलाडी शक्ति गौचनलाई कन्सल्टेन्ट प्रशिक्षकमा नियुक्त गरेको छ । लुम्बिनी लायन्सका मालिक ईश्वर जिसी र शक्ति गौचनले शनिबार उक्त सम्झौतापत्रमा हस्ताक्षर गरे । सम्झौता एक वर्षका निम्ति गरिएको हो ।

भैरहवाका शक्तिलाई सुरुआतदेखि नै लुम्बिनीले आफ्नो टिममा अनुबन्ध गर्न खोजेको टिमले जनाएको छ ।

लुम्बिनीसँग आबद्ध हुन पाउँदा निकै खुसी लागेको भन्दै शक्तिले नेपाल प्रिमियर लिगजस्तो मेगा इभेन्ट गरेकामा नेपाल क्रिकेट संघ (क्यान)लाई धन्यवाद दिए । अब हुने ‘अक्सन’ चुनौतीपूर्ण रहेको उनले बताए ।

कार्यक्रममा क्यानका सचिव पारस खड्काले नेपाली क्रिकेटको सफलतामा शक्ति गौचनको योगदान महत्त्वपूर्ण रहेको उल्लेख गरे ।

लुम्बिनीको मार्की खेलाडी राष्ट्रिय क्रिकेट टिमका कप्तान रोहितकुमार पौडेल हुन् । लुम्बिनीको स्वामित्व फर्चुन हेल्थ केयर प्रालिसँग छ । क्यानद्वारा आयोजित नेपाल प्रिमियर लिग आउँदो मंसिर १५ देखि पुस ६ गतेसम्म सञ्चालन हुनेछ । न्युज एजेन्सी नेपाल