लखनऊ । भारतको उत्तर प्रदेश सरकारले नेपालसँगको सीमाक्षेत्रमा ‘मित्र वन’ बनाउने घोषणा गरेको छ । योगी आदित्यनाथको सरकारले आफ्नो वृक्षरोपण जनअभियान २०२४ अन्तर्गत उक्त वनको घोषणा गरेको हो ।

मित्र वन बनाउन ३५ क्षेत्र छुट्ट्याइएको जनाइएको छ । मुख्यमन्त्री योगी आदित्यनाथको निर्देशनानुसार वन विभागका कर्मचारी उक्त अभियानका निम्ति सक्रिय भएर लागेका छन् ।

अभियानअन्तर्गत ३५ करोड बिरुवा रोपिनेछ । अभियान यही जुलाई २० देखि सुरु हुनेछ । नेपालसँग सीमा जोडिएका सबै जिल्लामा यसको तयारी भइरहेको जनाइएको छ ।

मुख्य रूपमा महाराजगन्जका सुनौली, लखिमपुर खेरी, श्राबस्ती, बहराइच, पिलभीतलगायत सीमावर्ती क्षेत्रमा वृक्षरोपण गरिनेछ । त्यसक्रममा सीमाक्षेत्रका नेपालका प्रतिनिधिसँग समेत संयुक्त रूपमा काम गरिने जनाइएको छ ।

योगी आदित्यनाथले भारतका प्रधानमन्त्री नरेन्द्र मोदीको ‘एक पेड मा के नाम’ अभियानलाई साथ दिन यो अभियान ल्याएका बताइएको छ । टाइम्स अफ इन्डियाबाट