काठमाडौं । गत जेठ २ मा संघीय मामिला तथा सामान्य प्रशासन मन्त्रालयका एकजना सहसचिवको घरमा चोरी भयो । ललितपुर भैँसेपाटी बस्दै आएका सहसचिवले घरबाट सुनका गरगहना तथा नगद गरी २८ लाख रुपैयाँ बराबरको धनमाल चोरी भएको उजुरी प्रहरी दिएका थिए ।

चोरीको उजुरीपछि ललितपुर प्रहरी र उपत्यका अपराध अनुसन्धान कार्यालयको टोलीले चोरीमा संलग्न व्यक्तिहरूको खोजी तीब्र पार्‍यो । उपत्यका अपराध अनुसन्धान कार्यालय ललितपुरको टोलीले चोरीमा संलग्न रामेछाप उमाकुण्ड गाउँपालिका–४ घर भई स्वयम्भू बस्ने सुजनकुमार सुनुवारलाई रामेछापबाट पक्राउ गरेको थियो ।

चोरीमा संलग्न सुनुवारसहित थप चार र सहसचिवको घरबाट चोरी भएको सुन खरिद गर्ने सुन व्यवसायीसहित पाँच जनालाई प्रहरीले पक्राउ गरेको थियो । चोरीमा संलग्न सुनुवारसहित नुवाकोटका ४० वर्षीय कुमार राना मगर, दोलखा शैलुङ गाउँपालिका–८ का ४१ वर्षीय वीरबहादुर श्रेष्ठ र सुनील श्रेष्ठलाई जिल्ला अदालत ललितपुरले पुर्पक्षका लागि जेल चलान गरेको छ ।

सुन खरिद गर्ने भोजपुरको पौवादुम्बा गाउँपालिका–४ का ३० वर्षीय सीताराम लकान्द्रे भने ५० हजार धरौटीमा रिहा भएको ललितपुरका एसपी नरेशराज सुवेदीले जानकारी दिए । चोरीमा संलग्न एकजना भने त्यो बेला फरार थिए । फरार हुनेमा रामेछाप दोरम्बा गाउँपालिका–१ का आङछिरिङ लामा थिए ।

प्रहरीको अनुसन्धानका क्रममा लामाले चोरी भएको सुनको व्यवस्थापन गरेका हुन् । प्रहरीले उनलाई पक्राउ गर्न नसकेपछि फरार प्रतिवादी बनाएर पठाइएको थियो । तर, उनी अझै पक्राउ परेका छैन ।

जिल्ला अदालतका सूचना अधिकारी रामसजिभन महतोका अनुसार चोरीकै एकजना फरार प्रतिवादी हाजिर भए पनि आङछिरिङ भने अझै अदालतमा हाजिर भएका छैनन् ।

नेकपा एमाले रामेछापका जिल्ला सचिव प्रकाशकुमार कार्कीले भने लामालाई कारबाही गरिएको बताए । उनले भने, “लामा हाम्रो जिल्लाको पूर्वजिल्ला कमिटी सदस्य हुन् । उनलाई कारबाही गरेका छौँ र कुनै जिम्मेवारीमा हुनुहुन्न ।”

लामा चोरीमा संलग्न दोलखाका वीरबहादुर श्रेष्ठ निकट सम्बन्ध देखिएको थियो । चोरी सुन समेत श्रेष्ठमार्फत नै लामाले व्यवस्थापन गरेको अनुसन्धानमा खटिएका प्रहरीले जनाएको छ । वीरबहादुर १२ पटक चोरी, तीन पटक डाँका चोरी तथा लागुऔषध मुद्दामा र अभद्र मुद्दामा २० भन्दा बढी पटक प्रहरीले पक्राउ गरेर मुद्दा चलाएका व्यक्ति हुन् ।