खोटाङ । अविरल वर्षासँगै विभिन्न ठाउँमा पहिरोले अवरुद्ध मध्यपहाडी लोकमार्ग तीन दिनपछि खुलाइएको छ ।

हलेसी तुवाचुङ नगरपालिकाका विभिन्न ठाउँमा बिहीबार राति खसेको पहिरोले सडक अवरुद्ध भएको थियो । नगरपालिका र मध्यपहाडी लोकमार्गको स्काभेटर प्रयोग गरेर तथा स्थानीय बासिन्दा र सुरक्षाकर्मीले पहिरो पन्छाएपछि शनिबार सडक खुलाइएको हो ।

हलेसी–जयराघाट सडकखण्डको बाहुनीडाँडास्थित कदुवा क्षेत्रमा पर्ने गोरुमारेमुनि, त्यसभन्दा मुनि डौँठेखोलामाथिको पहिरो हटाइएपछि अवरुद्ध यातायात खुलाइएको हलेसी तुवाचुङ नगरपालिकाका प्रवक्ता कमल गिरीले जानकारी दिए ।

“अवरुद्ध सडक खुलाउन दिनरात नभनी दुईवटा डोजर प्रयोग गरेका थियौँ । तीन दिन लगाएर पहिरो पन्छाइएपछि रोकिएका सबै गाडी पार गराइएको छ,” उनले भने, “पहिरोले विभिन्न ठाउँमा सडक अवरुद्ध भएपछि गाडीमा सवार एक हजारभन्दा बढी यात्रु अलपत्र पर्नुभएको थियो । पहिरो पन्छाएर सडक खोलेसँगै अलपत्र परेका यात्रु गन्तव्यतर्फ लागेका छन् ।”

राजधानी काठमाडौं तथा तराईका विभिन्न जिल्लाबाट खोटाङ आएका सानाठूला सवारीसाधन सडक अवरुद्ध भएपछि जयरामघाट, डौँठेखेला र दिक्तेल–भोजपुरतिरबाट छुटेका गाडी हलेसी, च्यास्मिटारलगायत ठाउँमा रोकिएका थिए । पहिरोले सडक अवरुद्ध भएर बीचसडकमा गाडी रोकिएपछि त्यसमा सवार एक हजारभन्दा बढी यात्रु अलपत्र परेका थिए ।

दिक्तेल–हलेसी–जयरामघाट हुँदै राजधानी काठमाडौं तथा तराईका जिल्ला जोड्ने सडक पटक–पटक अवरुद्ध हुँदै आएपछि विकल्पका रूपमा दिक्तेल–चखेवाभञ्ज्याङ सडकलाई निर्बाध सञ्चालन गर्ने प्रयास गरिएको छ । त्यसका निम्ति प्रतिनिधिसभा सदस्य एवं नेपाल कम्युनिस्ट पार्टी (माओवादी केन्द्र)का पोलिटब्युरो सदस्य रामकुमार राई नेतृत्वको टोलीले स्थलगत अध्ययन गरेर मर्मतकार्य सुरु गरिएको छ ।

मध्यपहाडी लोकमार्गबाहेक जिल्लाका सबै स्थानीय तहसँग जोडिएका अरू विभिन्न ग्रामीण सडक अझै अवरुद्ध छ । जिल्लाका १० वटै स्थानीय तहले अवरुद्ध सडक मर्मत सुरु गरे पनि अझै सम्भव भएको छैन ।

अवरुद्ध ग्रामीण सडक सञ्चालनमा ल्याउन १५ दिनअघि पहल थालिए पनि अविरल वर्षाका कारण सम्भव नभएको स्थानीय तहका जनप्रतिनिधिले बताएका छन् । दसँैतिहारअघि सबै ग्रामीण सडक सञ्चालनमा ल्याउन सम्बन्धित स्थानीय तहलाई जिल्ला विपद् व्यवस्थापन समिति समेतले आग्रह गरेको थियो ।

अवरुद्ध ग्रामीण सडक सञ्चालनमा ल्याउन नसक्दा दसैँतिहार मान्न विभिन्न सहरबाट घर फर्किएका स्थानीय बासिन्दा जिल्लाको प्रमुख व्यापारिक केन्द्र दिक्तेल बजारबाट घण्टौँ पैदल यात्रा गर्न बाध्य भएका छन् । रासस