पटना । भारतको बिहारमा बुधबार (हिजो) पाँच पुल भत्किएका छन् । यसअघि, नौ दिनका बीचमा पाँच पुल भत्किएको भन्दै एक संघीय मन्त्रीले षड्यन्त्र भइरहेको भनेर सार्वजनिक रूपमा आलोचना गरेका थिए ।

गएको जुन १८ यता बुृधबारसम्ममा त्यहाँ १० पुल भत्किएका छन् । बुधबार सिवान जिल्लामा छाडी नदीमा मात्र दुई पुल भत्किएका थिए ।

बुधबार नै सारण जिल्लामा गण्डकी नदीमा दुई पुल खसेका थिए । ती पुल खस्दा धेरै मानिस प्रभावित भएका जनाइएको छ ।

सिवानका जिल्ला अधिकारी मुकुलकुमार गुप्ताले भने, “छाडी एक मृत नदी थियो, अर्थात् त्यसमा पानी थिएन । तर, ‘जलजीवन हरियाली’ कार्यक्रमअन्तर्गत यो नदीलाई जीवित गरियो । यस इलाकामा अहिले हजारौं एकड जमिनमा खेती गर्न सम्भव भएको छ ।”

‘मृत नदी’ भएकाले त्यहाँको पुल पनि करिब ४५ वर्ष पुरानो भएको उनले बताए । त्यसैले वर्षाका कारण पुल खसेको उनको भनाइ थियो ।

बिहारमा यसअघि अररिया, सिवान, पूर्वी चम्पारण, किसनगन्ज र मधुवनीमा पनि पुल भत्किएका थिए । तिनमा केही निर्माणाधीन थिए भने केही बनिसकेका पुल थिए । बीबीसी हिन्दीबाट ।