काठमाडौं । प्रहरी प्रधान कार्यालयले उमेरहदका कारण अनिवार्य अवकाशमा जान लागेका प्रहरी अतिरिक्त महानिरीक्ष (एआईजी) उमेशराज जोशीको बिदाइ गरेको छ । उनी प्रदेश समन्वय विभागमा कार्यरत थिए ।

एआईजीको ५६ वर्ष उमेरहदका कारण १९ असारमा अवकाशमा जान लागेका हुन् । जोशीलाई मंगलबार प्रहरी प्रधान कार्यालयले बिदाइ गरेको हो । प्रहरी नियमावली, २०७१ अनुसार प्रहरीमा सेवा अवधि ३० वर्ष र उमेरहदसमेत राखिएको छ ।

डीआईजी र एआईजीको उमेर हद ५६ वर्ष र आईजीपीको ५८ वर्ष कायम गरिएको छ ।

११ असारमा डीआईजी सुरेन्द्र मैनालीलेसमेत उमेरहदकै कारण अवकाश पाएका छन् । जोशीको अवकाशको दुई दिनपछि अर्का प्रस्तावित (एआईजी) हाल डीआईजी पोषराज पोखरेलले समेत अवकाश पाउनेछन् ।

१० असारमा गृहसचिव नेतृत्वको बढुवा समितिले पोखरेललाई एआईजीमा बढुवा सिफारिस गरेको थियो ।

उनको सिफासिरलाई मन्त्रिपरिषद्ले स्वीकृत गर्नुपर्ने हुन्छ । उनको सिफारिस स्वीकृत नभए उनी डीआईजीबाट अवकाशमा जानेछन् ।