काठमाडौं । रोल्पामा जिप दुर्घटना हुँदा दुई जनाको मृत्यु भएको छ । उपचारका लागि जिल्ला अस्पताल रोल्पा पुर्‍याइएको चिकित्सकले दुई जनालाई मृत घोषणा गरेको प्रहरी निरीक्षक रोहितकुमार शाहीले जानकारी दिए ।

उनका अनुसार अन्य पाँच जनाको उपचार भइरहेको छ ।

"सात जनालाई अस्पताल पुर्‍याएका थियौँ । डाक्टर साबहरूले दुई जनालाई मृत घोषणा गर्नुभएको छ," उनले बाह्रखरीसँग भने ।

आज दिउँसो माडी गाउँपालिका–२ स्थित परेवा छहरामा लु १ ज ३२५२ नम्बरको जिप दुर्घटनामा परेको थियो । घर्तीगाउँ बजारबाट तालावाङ जाँदै गरेको जिप अनियन्त्रित भएर दुर्घटना भएको शाहीले बताए ।

उनका अनुसार जिपमा १४ जना सवार रहेको खुलेको छ । "सुरुमा १५ जना भनिएको थियो । अहिले १४ जना रहेको खुलेको छ," शाहीले भने ।