काठमाडौं । भारतीय क्रिकेट टिमका अलराउन्डर रविन्द्र जडेजाले पनि टी–२० अन्तर्राष्ट्रिय क्रिकेटबाट सन्न्यास लिएको घोषणा गरेका छन् ।
आइतबार इन्स्टाग्राममार्फत ३५ वर्षिय जडेजाले टी–२० अन्तर्राष्ट्रिय क्रिकेटबाट सन्न्यासको घोषणा गरेका हुन् ।
"कृतज्ञताका साथ टी–२० अन्तर्राष्ट्रिय खेललाई अलबिदा । मैले मेरो देशका लागि सधैँ आफ्नो उत्कृष्ट प्रदर्शन गरेँ र त्यसलाई अन्य ढाँचाहरूमा पनि जारी राख्नेछु । टी–२० विश्वकप जित्नु सपनाजस्तै थियो । तपाईंहरूको अटल विश्वासका लागि धन्यवाद," उनले लेखेका छन् ।
जडेजाले सन् २००९ मा अन्तर्राष्ट्रिय क्रिकेटमा डेब्यू गरेका थिए । उनले टी–२० ढाँचामा कुल ७४ खेल खेले । १२७.१६ को स्ट्राइक रेटमा ५१५ रन बनाएका उनले ५४ विकेट लिएका छन् ।
विश्वकपको उपाधि जितेपछि टी–२० अन्तर्राष्ट्रिय क्रिकेटबाट सन्न्यास लिने उनी तेस्रो खेलाडी बनेका छन् । यसअघि शनिबार कप्तान रोहित शर्मा र पूर्वकप्तान विराट कोहलीले सन्न्यासको घोषणा गरेका थिए ।
शनिबार बार्बाडोसमा भएको फाइनलमा दक्षिण अफ्रिकालाई हराउँदै भारतीय टोलीले १७ वर्षपछि टी–२० विश्वकपको उपाधि जितेको थियो ।
-1716278128.jpg)
-1706524096.JPG)
