काठमाडौं । समूह चरणको अन्तिम खेलमा अमेरिकालाई १–० ले हराउँदै उरुग्वे शतप्रतिशत जितसहित कोपा अमेरिका–२०२४ को क्वार्टरफाइनलमा प्रवेश गरेको छ ।

मंगलबार बिहान अरोहेड रंगशालामा उरुग्वेलाई जित दिलाउन माथियस ओलिभेराले निर्णायक गोल गरे । ओलिभेराले ६६औँ मिनेटमा गोल गर्दै उरुग्वेलाई अग्रतामा राखेका थिए ।

जितसँगै तीन खेलबाट नौ अंक जोडेको उरुग्वे समूह ‘सी’को विजेता बन्दै क्वार्टरफाइनलमा पुगेको हो । पराजित अमेरिका प्रतियोगिताको समूह चरणबाटै बाहिरिएको छ ।

पानामा ३–१ बोलिभिया
मंगलबार नै भएको अर्को खेलमा बोलिभियाविरुद्ध ३–१ को जित निकाल्दै पानामाले क्वार्टरफाइनलमा स्थान पक्का गरेको छ । जितसँगै पानामा समूह ‘सी’को उपविजेता बनेको हो ।

पानामाले तीन खेल खेल्दा ६ अंक जोड्यो । जितविहीन बोलिभिया तालिकाको पुछारमा रहँदै प्रतियोगिताबाट बाहिरियो ।