काठमाडौं । उपप्रधान तथा गृहमन्त्री रवि लामिछानेले नेपाल प्रहरीको केन्द्रीय अनुसन्धान ब्युरो (सीआईबी) गिरीबन्धु टी–इस्टेटको उजुरी कुरेर बसेको बताएका छन् । सोमबार प्रतिनिधिसभा बैठकमा बजेटमाथिको मन्त्रालयगत छलफलमा उठेका प्रश्नको जवाफ दिँदै उनले गिरीबन्धु, यति, ओम्नीलगायत काण्डमामा अनुसन्धान गर्न तत्पर रहेको बताए । 

“नेपाल प्रहरी र प्रहरीकाे केन्द्रीय अनुसन्धान ब्युरोलाई गिरीबन्धु टी–इस्टेटका बारेमा उजुरी माग्नका निमित्त सदनमा कुरा उठ्नुभन्दा हप्ता दिन अघि नै मन्त्रालयले स्पष्ट निर्देशन दिइसकेको छ । र, केन्द्रीय अनुसन्धान ब्युरो गिरीबन्धु टी–इस्टेटको उजुरीको प्रतिक्षा गरेर बसिरहेको छ,” उनले भने, “कुनै पनि बेला भएका विभिन्न किसिमका यी घटनाहरूका बारेमा नेपाल प्रहरी अनुसन्धान गर्न तत्पर भएर बसेको छ ।”

उनले कुनै पनि काण्डका बारेमा फाइल लुकाउनुपर्ने बाध्यता आफूमाथि नरहेको बताए । “कुनै पनि काण्डका विषयमा डराउनुपर्ने, नबोल्नुपर्ने, कुनै पनि फाइल नखोल्नुपर्ने एउटा पनि बाध्यता मेरो काँधमा छैन । शीरमा छैन,” गृहमन्त्री लामिछानेले भने ।