काठमाडौं । देशका केही साना नदीमा आज आकस्मिक बाढीको सम्भावना छ । विशेष गरी ११ जिल्लाका नदीमा आकस्मिक बाढीको जोखिम रहने पूर्वानुमान छ ।

पाँचथर, तेह्रथुम, संखुवासभा, धनकुटा, भोजपुर, खोटाङ, ओखलढुंगा, रामेछाप, दोलखा, सिन्धुपाल्चोक र रसुवा भई बहने साना नदीमा पानीको बहाव बढ्ने बाढी पूर्वानुमान महाशाखाले जनाएको छ । ती जिल्लाका केही साना नदीमा आकस्मिक बाढीको जोखिम रहने पूर्वानुमान छ ।

झापा, ताप्लेजुङ, इलाम, मोरङ, सुनसरी, सर्लाही, रौतहट, उदयपुर, सिन्धुली, मकवानपुर, गोरखा, धादिङ, तनहुँ, कास्की, लमजुङ, पाल्पा, डोटी, अछाम, बाँके, बर्दिया, जाजरकोट, बझाङ, बाजुरा र दैलेख भई बहने साना नदीमा पनि बहाव बढ्ने पूर्वानुमान छ ।

अबका तीन दिन देशका केही ठूला नदीहरूमा समेत बहाव बढ्दो हुने पूर्वानुमान छ । नदीतटीय क्षेत्रका क्रियाकलापमा उच्च सतर्कता अपनाउन महाशाखाले आग्रह गरेको छ ।