![अभिकले जिते एसईई कप चेसको उपाधि](https://12khari.top/uploads/posts/4-(3)-1719164271.jpeg)
काठमाडौं । हिमालयन चेस एकेडेमीले आयोजना गरेको गोल्डेनगेट एसईई कप–२०२४ र्यापिड चेस प्रतियोगिताको उपाधि अभिक शाहले जितेका छन् ।
उनले स्विस प्रणालीको आधारमा सात राउन्डमा सञ्चालित प्रतियोगितामा अपराजित रहँदै ६.५ अंक बनाएर आइतबार उपाधि जितेका हुन् ।
शीर्ष वरीयताका खेलाडी पुरुषोत्तम सिलवालले पनि अपराजित रहँदै ६.५ अंक बनाए । तर, टाइब्रेकरको आधारमा पुरुषोत्तमलाई पछाडि पार्दै जेम्स स्कुलका अधिकले उपाधि कब्जा गरेका हुन् ।
अभिक र पुरुषोत्तबीच पाँचौँ चरणमा भएको प्रतिस्पर्धा बराबरीमा टुंगिएको थियो । त्यसबाहेक दुवै खेलाडीले बाँकी ६ खेलमा जित हात पारेका थिए ।
विभूषित कायस्थ ५ अंक जोड्दै तेस्रो स्थानमा रहे । रोहित श्रेष्ठ, रोहन खतिवडा र रायन श्रेष्ठले समान ५ अंक बनाएका थिए । तर, टाइब्रेकरको आधारमा विभूषित सबभन्दा अगाडि रहँदै तेस्रो भएका हुन् ।
![Global Ime bank](https://baahrakhari.com/uploads/bigyaapan/30885600.gif)
गोल्डेनगेट इन्टरनेसनल कलेज, बत्तीसपुतलीमा सञ्चालित प्रतियोगितामा ३ अंक जोड्दै मेधा माध्यमिक विद्यालयकी अंशु दिल प्रजापतिले गर्ल्सतर्फ पहिलो स्थान हात पारिन् । कृशला प्रजापति दोस्रो र जेसिका सिंह तेस्रो भए । दुवैले समान २ अंक बटुलेका थिए । टाइब्रेकरको आधारमा कृशला दोस्रो भएकी हुन् ।
प्रतियोगिताको मुख्य प्रायोजक गोल्डेनगेट कलेजले कुनै पनि विषयमा दुवै स्पर्धाका विजेतालाई शतप्रतिशत छात्रवृत्ति, उपविजेतालाई ७५ प्रतिशत र तेस्रोलाई ५० प्रतिशत छात्रवृत्ति उपलब्ध गराएको छ ।
त्यस्तै, सहभागी सबै खेलाडीलाई एक तिहाइ (३३.३३ प्रतिशत) छात्रवृत्ति दिने घोषणा गरिएको छ ।
एसईई परीक्षा दिएका ४१ खेलाडी सहभागी प्रतियोगितामा खुला तथा गर्ल्स दुवै स्पर्धाका विजेताले १० हजार, उपविजेताले पाँच हजार र तेस्रोले तीन हजार रुपैयाँ, ट्रफी, पदक तथा प्रमाणपत्र प्राप्त गरे ।
उनीहरूलाई राष्ट्रिय खेलकुद परिषद्का पूर्वसदस्यसचिव रमेशकुमार सिलवाल, हिमालयन चेस एकेडेमीकी अध्यक्ष मोनालिशा खम्बू, गोल्डेनगेट इन्टरनेसनल कलेजकी निर्देशक सैल सुमन सिलवाललगायतले पुरस्कार वितरण गरेका थिए ।