काठमाडौं । दक्षिण अमेरिकी र उत्तर अमेरिकी राष्ट्रहरूले प्रतिस्पर्धा गर्ने कोपा अमेरिका–२०२४ शुक्रबारदेखि सुरु हुँदै छ ।

अमेरिकाका विभिन्न सहरहरूमा करिब एक महिनासम्म सञ्चालन हुने प्रतियोगिताको पहिलो दिन साविक विजेतासमेत रहेको अर्जेन्टिनाले क्यानडाविरुद्ध खेल्नेछ ।

अमेरिकाको मर्सिडिज बेन्ज रंगशालामा हुने यो खेल नेपाली समयअनुसार बिहान ५ः४५ बजेदेखि सुरु हुनेछ ।

प्रतियोगिताको यस संस्करणमा कुल १६ टिमको सहभागिता छ । जसलाई प्रत्येक समूहमा चार टिम रहने गरी चार समूहमा विभाजन गरिएको छ । प्रत्येक समूहकबाट शीर्ष दुई टोली क्वार्टरफाइनल प्रवेश गर्नेछन् ।

आगामी जुलाई १४ सम्म सञ्चालन हुने प्रतियोगिताको फाइनल खेल मियामीमा हुनेछ । अमेरिकाले दोस्रोपटक कोपा अमेरिकाको आयोजना गर्न लागेको हो ।

यसअघि सन् २०२१ मा भएको पछिल्लो संस्करणको उपाधि अर्जेन्टिनाले जितेको थियो । उक्त संस्करणको फाइनलमा ब्राजिललाई १–० ले हराउँदै अर्जेन्टिना च्याम्पियन बनेको हो ।