काठमाडौं । नेपाली राष्ट्रिय क्रिकेट टिमका अलराउन्डर दीपेन्द्रसिंह ऐरी आईसीसी ट्वान्टी–२० अलराउन्डर वरीयताको छैटौँ स्थानमा उक्लिएका छन् ।

आईसीसीले बुधबार अद्यावधिक गरेको नयाँ वरीयताअनुसार दीपेन्द्र विश्वकै शीर्ष छैटौँ अलराउन्डर बनेका हुन् । यसअघि दीपेन्द्र वरीयताको नवौँ स्थानमा थिए । दीपेन्द्र आईसीसीको ट्वान्टी–२० अलराउन्डर वरीयतामाको शीर्ष २० मा रहेका नेपालका एकमात्र क्रिकेटर समेत हुन् ।

दीपेन्द्र ट्वान्टी–२० बलिङ वरीयतामा पनि समावेश भएका छन् । दीपेन्द्र बलिङ वरीयतामा २७ स्थान सुधार गर्दै ९६औँ स्थानमा उक्लिएका छन् । ट्वान्टी–२० बलिङ वरीयतामा नेपालका दुई बलर समावेश भएका छन् । दीपेन्द्रभन्दा अघि रहेका सोमपाल कामी वरीयताको ९१औँ स्थानमा छन् । सोमपालले वरीयतामा आठ स्थान सुधार गरेका हुन् ।

दीपेन्द्र ट्वान्टी–२० ब्याटिङ वरीयताका पनि अटाएका छन् । दीपेन्द्र आईसीसीबाट अद्यावधिक भएको वरीयताको ४६औँ स्थानमा छन् । दीपेन्द्रले यसअघिको वरीयतामा पाँच स्थान सुधार गरेका हुन् । ट्वान्टी–२० को ब्याटिङ वरीयतामा दीपेन्द्र भारतका विराट कोहलीभन्दा अघि छन् । कोहली हाल वरीयताको ५०औँ स्थानमा छन् ।

यस्तै, नेपालका कप्तान रोहितकुमार पौडेल भने ६ स्थान घटुवामा पर्दै ६१औँ स्थानमा पुगेका छन् । ओपनर आसिफ सेख २० स्थान सुधार गर्दै ६९औँ स्थानमा उक्लिएका छन् । यसबाहेक, ब्याटिङ वरीयताको शीर्ष १०० भित्र नेपालका अन्य ब्याटर अटाएका छैनन् ।