काठमाडौं । आईसीसी ट्वान्टी–२० विश्वकप–२०२४ मा ओपनर ब्याटर आसिफ सेख नेपालबाट सबैभन्दा धेरै रन जोड्ने ब्याटर बनेका छन् । अमेरिका र वेस्ट इन्डिजमा जारी विश्वकपमा बलिङबाट विश्वभर चर्चा कमाए पनि नेपालकाे ब्याटिङ भने बिर्सनलायक थियो । नेपालबाट प्रतियोगिताभर कुनै पनि ब्याटरले अर्धशतक बनाउन सकेनन् । 

प्रतियोगितामा नेपालबाट सबैभन्दा धेरै रन बनाउने ब्याटर बनेका आसिफले कुल तीन खेलमा ६३ रन बनाए । उनले दक्षिण अफ्रिकाविरुद्ध सर्वाधक ४२ रन बनाए । प्रतियोगितामा यो नै नेपाली टिमबाट कुनै पनि ब्याटरले एकै इनिङमा बनाएको सर्वाधिक स्कोरसमेत बन्यो ।

यो सूचीको दोस्रो स्थानमा ३९ रनसहित अनिल साह र तेस्रो स्थानमा ३८ रनसहित कुशल मल्ल छन् ।

यस्तै, बलिङतर्फ दीपेन्द्रसिंह ऐरी नेपालबाट सबैभन्दा धेरै विकेट लिने खेलाडी बने । दीपेन्द्रले नेपालबाट विश्वकपमा तीन खेल खेल्दा सर्वाधिक ६ विकेट लिए । यो सूचीको दोस्रो स्थानमा कुशल भुर्तेल र तेस्रो स्थानमा सोमपाल कामी छन् । भुर्तेलले चार विकेट लिँदा सोमपालले नेपालबाट तीन विकेट लिएका थिए ।

१० वर्षपछि विश्वकपमा छनोट भएको नेपाल प्रतियोगिताको समूह ‘डी’ मा थियो । यो समूहमा नेपालसँगै, दक्षिण अफ्रिका, नेदरल्यान्ड्स, श्रीलंका र बंगलादेश थिए ।

प्रतियोगिताको समूह चरणबौ बाहिरिएको नेपालले कुनै पनि खेलमा जित निकाल्न सकेन । नेपालले समूह चरणको पहिलो खेलमा नेदरल्यान्ड्ससँग ६ विकेटको हार बेहोरेको थियो । दोस्रो खेल वर्षाका कारण नतिजाविहीन बन्दा नेपाल र श्रीलंकाले समान एक अंक बाँडेका थिए । तेस्रो खेलमा दक्षिण अफ्रिकाविरुद्ध एक रनले पराजित भएको नेपाल तेस्रो खेलमा बंगलादेशविरुद्ध २१ रनले निराश बनेको थियो ।