लण्डन । नेपालका हरि बुढा मगर बेलायतका राजा चाल्र्स तृतीयको बर्थडे अनर्स लिस्ट २०२४मा पर्न सफल भएका छन् । बेलायती राजाको जन्म दिन जुन १५ तारेखमा हो ।
बेलायती मन्त्रिपरिषदको शुक्रबारको बैठकले नेपालका मगरसहित १०७८ जनाको नाम सहितको सूची जुन १४ तारेखमा प्रकाशित गरेको थियो । सो सूचीमा मगरको नाम ४१२ नम्बरमा उल्लेखित छ ।
दुवै खुट्टा नभएका मगर नेपालको रोल्पा जिल्लाको मुराल गाउँका हुन् । पूर्व ब्रिटिश गोर्खा रहेका उनले अफगानिस्तानमा युद्धका क्रममा दुवै खुट्टा गुमाएका थिए । सन् २०१०मा अफगानिस्तानमा उनी प्याट्रोलमा रहेको बेलामा विस्फोटक पदार्थ विस्फोट हुँदा दुवै खुट्टा गुमाएका हुन् ।
उनी १९ वर्षको उमेरमा ब्रिटिश आर्मीमा भर्ना भएका थिए । ४५ वर्षीय मगरले दुवै खुट्टा नभएका व्यक्ति सगरमाथा आरोहणको रेकर्ड पनि बनाएका छन् । उनले २०२३मा सगरमाथाको सफल आरोहण गरेका थिए ।
कुनै कुरामा सफलता पाउन चाहनु हुन्छ भन्ने केही पनि असम्भव छैन भन्ने भनाइका प्रतीकका रुपमा हरिबहादुरलाई लिने गरिएको छ । उनी पोजिटिभ थट मुभमेन्टका ग्लोबल गुडविल एम्बेसेडर पनि हुन् ।
त्यसैगरी उनी गोर्खा वेलफेयर ट्रष्टका पनि एम्बेसेडर हुन् । उनले ६ हजार मिटर माथिको मेरा पिक (६,४७६मिटर) तथा मोन्ट ब्ल्यान्क (४,८१० मिटर), माउन्ट चुलु फार इस्ट (६,०५९मिटर) र माउन्ट किलिमान्जरो (५,८९५ मिटर) समेत सफल आरोहण गरेका छन् ।
बेलायतका राजाकोे बर्थ डे अनर सूचीमा असाधारण योगदान गरेका बेलायतमा विभिन्न सेवामा रहेका मानिसहरुलाई राख्ने गरिएको छ । उनले अपांगता भएका व्यक्तिका सहयोग सम्बन्धी च्यारिटीका लागि करिब ८ लाख पाउण्ड रकम जम्मा गरेका छन् ।
पछिल्लो अनरबाट आफू ज्यादै खुसी भएको उनले बताएका छन् । आफू नेपालमा जन्मेको बेलामा अपांगता भएका मानिसलाई पृथ्वीका भारका रुपमा लिने गरिएको उल्लेख गर्दै अपांगतालाई पूर्वजन्मको पाप पनि भन्ने गरिएको जनाएका छन् ।
तर आफूले त्यसबारेमा सचेतना फैलाउन खोजेको र अपांगता भएका मानिसलाई उनीहरुको आफ्नै हिमाल जेसुकै होस् चढ्नका लागि उत्प्रेरित गर्न चाहेको सार्वजनिक प्रतिक्रिया दिएका छन् । सो सूचीका लागि बेलायतमा विभिन्न योगदान गर्ने व्यक्तिलाई प्रधानमन्त्री तथा अन्य वरिष्ठ मन्त्रीले सिफारिस गर्ने गर्दछन् । (एजेन्सी)