विराटनगर । कोसी प्रदेशमा हालसम्म पाँच बजेट कार्यान्वयन भएको छ । यो अवधिमा कोसी सरकारले ५२८ किलोमिटर बहुवर्षीय सडक कालोपत्र गरेको जनाइएको छ ।

आर्थिक मामिला तथा योजनामन्त्री रामबहादुर मगरले शनिबार प्रदेशसभामा आउँदो आर्थिक वर्षको बजेट प्रस्तुत गर्दै पूर्वाधार निर्माणमा सरकारले उल्लेखनीय उपलब्धि हासिल गरेको जिकिर गरे ।

यो अवधिमा कोसी सरकारले एक हजार २९७ किमि सडक ग्राभेल गरेको उनले बताए । चार हजार किमि सडक निर्माण तथा स्तरोन्नति र ७८ प्रादेशिकमध्ये २२ सडक सम्पन्न भएको उनले सुनाए ।

कोसी प्रदेशमा सबैभन्दा धेरै आर्थिक वर्ष २०७८/०७९ मा ८९ प्रतिशत पुँजीगत खर्च भएको उनले जानकारी गराए । सरकारबाट हालसम्म ३३ सरकारी, १०५ सामुदायिक भवन, ११ भ्युटावर, जनता आवासबाट पाँच हजार परिवारको आवासको प्रबन्ध भएको उनले बताए ।

पाँच वर्षमा सरकारले कृषि उद्यमीलाई चार अर्ब ९३ करोड रुपैयाँ अनुदान दिएको उनले जानकारी गराए ।

यो अविधमा ६२ ऐन र ६४ नियामवली तर्जमा भएको छ । सरकारले चालु आर्थिक वर्षको वैशाख मसान्तसम्म कुल ४३ प्रतिशत खर्च गरेको उनले बताए ।