काठमाडौं । सिन्धुपाल्चोकको बाह्रबिसे नगरपालिका–४, बेतेस्थित नेपाल विद्युत् प्राधिकरणको सबस्टेसनमा झगडा हुँदा केही व्यक्ति घाइते भएका छन् । बाह्रबिसे सबस्टेसनको कम्पाउन्डभित्र झगडा भएको वाग्मती प्रदेश प्रहरी कार्यालयले जानकारी गराएको छ ।

बिहीबार (हिजो) बेलुका बाह्रबिसे नगरपालिका–२ का ४२ वर्षीय विकास तामाङसहित ९/१० जना स्थानीयको समूह उक्त सबस्टेसनमा पुगेको थियो । त्यहाँ उनीहरूले रकम मागेर झगडा गरेको जिल्ला प्रहरी कार्यालय सिन्धुपाल्चोकका सूचना अधिकारी एवं डीएसपी निरञ्जन भट्टराईले जानकारी दिए ।

उनका अनुसार, उक्त सबस्टेसनमा खरिदकर्ताबाट ट्रान्समिटर खरिद गरी ल्याइएको थियो । त्यसबापत आफूहरूलाई रकम (कमिसन) दिनुपर्ने भन्दै स्थानीयले ट्रान्सपोर्ट कम्पनीका मानिससँग विवाद गरेका थिए ।

उक्त ट्रान्समिटर ल्याइएको गाडीलाई उनीहरूले सबस्टेसनको कम्पाउन्डबाट बाहिर निस्कन अवरोध गरेका थिए । त्यसक्रममा कर्मचारी र स्थानीयबीच झगडा भएको उनले बताए ।

झगडामा घाइते भएका बाह्रबिसे–२ का २६ वर्षीय विवेक तामाङ, सोही ठाउँका २१ वर्षीय मिलन तामाङ र उक्त स्थानकै ४२ वर्षीय विकास तामाङको उपचार जारी छ । धुलिखेल अस्पतालमा उनीहरूको उपचार भइरहेको प्रहरीले जनाएको छ ।

“दुवै पक्षका केही मानिसलाई चोट लागेको थियो । त्यसमध्ये उहाँ (तीनजना)हरू अलि बढी घाइते हुनुभएको हो,” डीएसपी भट्टराईले बाह्रखरीसित भने, “अरू केहीलाई पनि सामान्य चोट लागेको छ ।”

वादविवाद गर्ने अरू व्यक्तिको पहिचान नखुलेको प्रहरीले जनाएको छ । घटनामा कोही व्यक्ति पक्राउ परेका छैनन् ।