काठमाडौं । नेकपा(एमाले)का सांसद मानवीर राईले लुक्ला विमानस्थलको स्तरोन्नति गर्न सरकारले उच्च प्राथमिकता दिनुपर्ने बताएका छन् । बिहीबार प्रतिनिधिसभाको बैठकमासांसद राईले सोलुखुम्बुस्थित लुक्ला विमानस्थलको उच्च प्राथमिकताका साथ स्तरोन्नति गर्न सरकारसँग माग गरेका हुन् ।

सगरमाथा घुम्न जाने पर्यटकहरूले यही विमानस्थलको प्रयोग गर्ने भन्दै उनले एकपटक आएका पर्यटक पुनः विमानस्थलमा नआउने गरेको बताए । उनले पर्यटन विकासको मुख्य आधार नै सगरमाथा रहेको उल्लेख गर्दै यस विमानस्थलाई सगरमाथाको पहुँचमार्गको रूपमा लिएर स्तरोन्नति गर्नुपर्ने बताए । 

“संसारका पर्यटकहरू सगरमाथा घुम्न आउँछन् । तर, एकमात्र हवाइ यात्रा लुक्ला एयरपोर्ट छ । सानो एयरपोर्ट छ । दुःख कष्ट सहेर त्यो क्षेत्रमा पर्यटक आउन बडो गाह्रो मान्ने परिस्थिति छ । पर्यटन विकास हाम्रो मुलुकको आधार हो भने यसलाई प्राथमिकता दिनुपर्छ । गएको सालको बजेटले त्यसलाई समेट्न सकेन । अहिले मन्त्रीज्यूले प्राथमिकतामा राखेको छु भन्नुभएको छ । प्राथमिकतामा मात्रै होइन उच्च प्राथमिकतामा राखेर सगरमाथाको पहुँचमार्ग भनेर उल्लेख गर्नु जरुरी छ,” सांसद राईले भने । 

उनले सरकारले कृषि क्षेत्र र जलविद्युत्को क्षेत्रलाई पनि प्राथमिता दिनुपर्ने बताए ।